പയ്യാവൂർ: കേരള സർക്കാർ അനാഥ അഗതി ദിനമായി ആചരിച്ചുവരുന്ന വിശുദ്ധ മദർ തെരേസയുടെ ജന്മദിനമായ ഇന്നലെ സാമൂഹ്യനീതി വകുപ്പിന്റെയും ഓർഫനേജ് കൺട്രോൾ ബോർഡിന്റെയും സംയുക്താഭിമുഖ്യത്തിൽ കണ്ണൂർ ജില്ല തലത്തിൽ സംഘടിപ്പിച്ച ചടങ്ങ് പയ്യാവൂർ വെമ്പുവയിലെ അഗതി സംരക്ഷണ കേന്ദ്രമായ തെരേസ ഭവനിൽ നടന്നു. കണ്ണൂർ ജില്ല അസിസ്റ്റന്റ് കളക്ടർ ഗ്രന്ഥെ സായികൃഷ്ണ ഉദ്ഘാടനം ചെയ്തു. ഏരുവേശി ഗ്രാമപഞ്ചായത്ത് പ്രസിഡന്റ് മിനി ഷൈബി അധ്യക്ഷത വഹിച്ചു. ഓർഫനേജ് കൺട്രോൾ ബോർഡ് മെമ്പർ സിസ്റ്റർ വിനീത ഡി.എസ്.എസ് മുഖ്യാതിഥിയായി. ജില്ല സാമൂഹിക നീതി ഓഫീസർ പി.ബിജു ആമുഖ പ്രഭാഷണവും വെമ്പുവ ഇടവക വികാരി ഫാ. ജോർജ് എളൂക്കുന്നേൽ അനുസ്മരണ പ്രഭാഷണവും നടത്തി. ഏരുവേശി ഗ്രാമപഞ്ചായത്ത് മുൻ പ്രസിഡന്റ് ടെസി ഇമ്മാനുവൽ, പി.കെ. നാസർ, എം.ജെ. സ്റ്റീഫൻ, തെരേസ ഭവൻ ഡയറക്ടർ ബ്രദർ ടി.കെ. സജി എന്നിവർ പ്രസംഗിച്ചു. അന്തേവാസികൾ അവതരിപ്പിച്ച കലാപരിപാടികളും അരങ്ങേറി.