ചാലിയം: ചാലിയത്ത് ഭീമൻ ഡോൾഫിൻ കരയ്ക്കടിഞ്ഞു. ഇന്നലെ രാവിലെ ഏഴോടെ ചാലിയം തീരത്താണ് ദിവസങ്ങൾ പഴക്കമുള്ള രണ്ടു മീറ്ററിലധികം നീളമുള്ള ഡോൾഫിൻ കരയ്ക്കടിഞ്ഞത്. ഡോൾഫിൻ കടലിൽ ഒഴുകി നടക്കുന്നത് ശ്രദ്ധയിൽപ്പെട്ട നാട്ടുകാർ വടംകെട്ടി കരയ്ക്കടുപ്പിച്ച് അധികൃതരെ വിവരമറിയിക്കുകയായിരുന്നു. കടലുണ്ടി മൃ​ഗാശുപത്രിയിലെ വെറ്ററിനറി ഡോക്ടർ ആനന്ദ് സ്ഥലത്തെത്തിയെങ്കിലും അഴുകിത്തുടങ്ങിയതിനാൽ പോസ്റ്റുമോർട്ടം നടത്താനായില്ല. തുടർന്ന് ജെ.സി.ബി ഉപയോ​ഗിച്ച് വാർഡ് മെമ്പർ ടി.കെ.റബീലത്ത്, താമരശ്ശേരി സെക്ഷൻ ഫോറസ്റ്റ് ഓഫീസർ കെ.ദിദീഷ്, കെ.പി.ജലീൽ തുടങ്ങിയവരുടെ നേതൃത്വത്തിൽ ചാലിയം തീരത്ത് കുഴിയെടുത്ത് സംസ്കരിച്ചു.