കോട്ടയം: വയനാട് ദുരിത ബാധിതർക്ക് കൈത്താങ്ങായി മൂഴിപ്പാറ, സെന്റ് ജോൺസ് എന്നീ സ്വകാര്യ ബസ് സർവീസുകൾ. ചങ്ങനാശേരി, കോട്ടയം, ഞാലിയാകുഴി, കുമരകം എന്നീ റൂട്ടുകളിൽ സർവീസ് നടത്തുന്ന മൂഴിപ്പാറ ട്രാവൽസിന്റെ ഏഴ് ബസുകളാണ് ദുരിതമനുഭവിക്കുന്നവർക്ക് വേണ്ടി ഇന്നലത്തെ ഓട്ടം മാറ്റിവച്ചത്. ദുരന്ത ഭൂമിയിലെ ഉള്ളുലയ്ക്കുന്ന കാഴ്ചകൾ കണ്ട ബസുടമയായ കൊച്ചുമോൻ ബസ് ജീവനക്കാരുടെ മുൻപിൽ ആശയം അവതരിപ്പിക്കുകയായിരുന്നു. ജീവനക്കാരും ഉടമയ്‌ക്കൊപ്പം ചേർന്നു. ബസുകളിലെ 14 ജീവനക്കാരും തങ്ങളുടെ ഇന്നലത്തെ ശമ്പളം വേണ്ടെന്ന് വച്ച് ഉടമയുടെ നിർദേശം സ്വീകരിച്ചു. ടിക്കറ്റ് ഒഴിവാക്കി പ്രത്യേക കളക്ഷൻ ബക്കറ്റുകളിൽ യാത്ര ചെയ്യുന്നവർ നൽകുന്ന തുക സ്വീകരിച്ചു. എല്ലാ ജീവനക്കാരും ഉടമയും ചേർന്ന് ഏഴ് ബസുകളുടെയും മുൻപിൽ വയനാടിനൊരു കൈത്താങ്ങ് എന്ന് നാമകരണം ചെയ്ത ബാനറുകൾ കെട്ടിയാണ് ഓട്ടത്തിനായി തയ്യാറെടുത്തത്. യാത്രയിലൂടെ ലഭിക്കുന്ന തുക ജില്ലാ കളക്ടർക്ക് കൈമാറും.