തലയോലപ്പറമ്പ്: തലയോലപ്പറമ്പ് യൂണിയൻ സംയുക്ത ജയന്തി ആഘോഷങ്ങൾ ഒഴിവാക്കി വയനാട് ദുരിതാശ്വാസ പ്രവർത്തനങ്ങളിൽ പങ്കാളികളാകും. എസ്.എൻ.ഡി.പി യോഗം കെ.ആർ.നാരായണൻ സ്മാരക തലയോലപ്പറമ്പ് യൂണിയൻ സംയുക്ത യോഗം യൂണിയൻ പ്രസിഡന്റ് ഇ.ഡി.പ്രകാശന്റെ അദ്ധ്യക്ഷതയിൽ കൂടി. യൂണിയൻ സെക്രട്ടറി എസ്.ഡി.സുരേഷ് ബാബു വയനാട് ദുരന്തത്തിൽ മരണമടഞ്ഞവർക്കായി അനുശോചന പ്രമേയം അവതരിപ്പിച്ചു. 170ാമത് ഗുരുദേവ ജയന്തി ആഘോഷങ്ങളിൽ ഘോഷയാത്രയും മറ്റ് ആഘോഷങ്ങളും ഒഴിവാക്കി. വയനാട് ദുരന്തത്തിനിരയായവർക്കായി ഗവൺമെന്റ് വഴി എസ്.എൻ.ഡി.പി യോഗം നടത്തുന്ന ദുരിതാശ്വാസ പ്രവർത്തനങ്ങളിൽ യൂണിയൻ പങ്കുചേരും. ഗുരുജയന്തി നാളിൽ ശാഖകളിൽ ഗുരുപൂജയും സമൂഹ പ്രാർത്ഥനയും നടത്തുന്നതിന് തീരുമാനിച്ചു. യൂണിയൻ വൈസ് പ്രസിഡന്റ് രഞ്ജിത്‌ രാജപ്പൻ സ്വാഗതം പറഞ്ഞു. യൂണിയൻ കൗൺസിൽ അംഗങ്ങളായ യു.എസ്. പ്രസന്നൻ, പി.കെ.ജയകുമാർ, യൂത്ത് മൂവമെന്റ് പ്രസിഡന്റ് അഭിലാഷ്, സെക്രട്ടറി സജി സദാനന്ദൻ, ഗൗതം സുരേഷ് ബാബു, വനിതാ സംഘം ഭാരവാഹികളായ ജയ അനിൽ, ധന്യ പുരുഷോത്തമൻ, രാജി ദേവരാജൻ, വത്സ മോഹനൻ, ആശ അനീഷ് തുടങ്ങിയവർ പ്രസംഗിച്ചു.