വൈക്കം: മദ്യപിച്ച ശേഷം പണം നൽകാത്തതിന്റെ പേരിൽ ബാർ അധികൃതരുമായി കലഹിച്ച കെ.എസ്.ഇ.ബി ജീവനക്കാർ വിരോധം തീർത്തത് പ്രദേശത്തെ ഫ്യൂസ് ഊരി. കഴിഞ്ഞ ഞായറാഴ്ച രാത്രി ഒമ്പതോടെ തലയാഴത്താണ് സംഭവം. തോട്ടകത്ത് പുതിയതായി തുടങ്ങിയ ബാർ ഹോട്ടലിലെത്തി ഏതാനും കെ.എസ്.ഇ.ബി ജീവനക്കാർ മദ്യപിച്ചു. എന്നാൽ ബിൽ തുക പൂർണമായി നൽകാൻ ഇല്ലാതിരുന്നതിനാൽ ബാക്കി പിന്നെ തരാമെന്ന് പറഞ്ഞെങ്കിലും ബാർ അധികൃതർ സമ്മതിച്ചില്ല. തുടർന്ന് ഇവിടെ നിന്ന് പോയ കെ.എസ്.ഇ.ബി ജീവനക്കാർ പ്രദേശത്തെ ഫ്യൂസ് ഊരി വിരോധം തീർക്കുകയായിരുന്നു. ബാർ ഹോട്ടലിലടക്കം പ്രദേശത്തെ വീടുകളിൽ 20 മിനിട്ടോളം വൈദ്യുതി മുടങ്ങി. ബാറിലെ തർക്കത്തിന്റെ പേരിൽ ഒരു പ്രദേശത്തെയാകെ മിനിട്ടുകളോളം ഇരുട്ടിലാക്കിയ ജീവനക്കാർക്കെതിരെ അന്വേഷണം വേണമെന്നാണ് നാട്ടുകാരുടെ ആവശ്യം.