കട്ടപ്പന :നഗരസഭയുടെ പച്ചക്കറി,മത്സ്യ മാർക്കറ്റുകൾ,പുതിയ ബസ് സ്റ്റാൻഡ് പഴയ ബസ്റ്റാൻഡ് തുടങ്ങിയ വിവിധ പൊതു ഇടങ്ങളിലെ പാതകൾ ശോച്യാവസ്ഥയിലായി.പാതകൾ ഗതാഗതയോഗ്യമല്ലാതായി കിടന്നിട്ടും അധികൃതരുടെ ഭാഗത്തുനിന്ന് യാതൊരുവിധ പരിഹാരമാർഗ്ഗവും ഉണ്ടായിട്ടില്ല. നിരവധി പരാതികളും നിവേദനകളും അടക്കം നൽകിയിട്ടും പാതകളുടെ അപകടാവസ്ഥയും ശോച്യാവസ്ഥയും പരിഹരിക്കാൻ നഗരസഭയുടെ ഭാഗത്തുനിന്ന് നടപടി ഉണ്ടാവാത്ത സാഹചര്യത്തിൽ വ്യാപാരി വ്യവസായി സമിതി രംഗത്ത് വന്നു. വിഷയം അധികൃതരുടെ ശ്രദ്ധയിൽപ്പെടുത്താൻ വ്യാപാരികളുടെ ഒപ്പുകൾ ശേഖരിക്കുകയും അടിയന്തര പരിഹാരം ഉണ്ടാകണമെന്നവശ്യപ്പെട്ട് നഗരസഭ അദ്ധ്യക്ഷ ബീന ടോമിക്ക് നിവേദനം നൽകുകയും ചെയ്തു.

പച്ചക്കറി, മത്സ്യ മാർക്കറ്റുകളിലെ പാതകൾ ശോച്യാവസ്ഥയിലായതോടെ മാർക്കറ്റിലേക്ക് എത്തുന്ന പൊതുജനങ്ങൾക്ക് വലിയ ബുദ്ധിമുട്ടാണ് ഉണ്ടാകുന്നത്. പാതയുടെ കോൺക്രീറ്റ് പാളികൾ ഇളകി കോൺക്രീറ്റ് കമ്പികൾ പുറത്തോട്ട് നിൽക്കുന്നതിനാൽ ഇതിൽ ആളുകൾ തട്ടിവീഴുന്നത് പതിവായിരിക്കുകയാണ്. കൂടാതെ വാഹനങ്ങളുടെ ടയറുകൾ പഞ്ചറാകുന്നതിനും കാരണമാകുന്നു. .ബസ്റ്റാൻഡ് അടക്കമുള്ള പൊതു ഇടങ്ങളിലെ കവാടങ്ങളിൽ രൂപപ്പെട്ട ഗർത്തങ്ങളും അടിയന്തരമായി പരിഹരിക്കണമെന്നാണ് വ്യാപാരി വ്യവസായി സമിതി ആവശ്യപ്പെടുന്നത്.