കോട്ടയം : കോട്ടയം റെയിൽവേ സ്‌റ്റേഷനിലെ പ്ലാറ്റ്‌ഫോമിൽ നിന്ന് മൊബൈൽ ഫോൺ മോഷ്ടിച്ച പ്രതിയെ നിമിഷങ്ങൾക്കകം പിടികൂടി റെയിൽവേ പൊലീസ്. ചവിട്ടുവരി മിനി മന്ദിരത്തിൽ ശിവപ്രസാദ് (49) നെയാണ് സ്‌റ്റേഷൻ ഹൗസ് ഓഫീസർ റെജി പി.ജോസഫിന്റെ നേതൃത്വത്തിലുള്ള സംഘം പിടികൂടിയത്. ഇന്നലെ ഉച്ചയ്ക്ക് 1.30 ഓടെ റെയിൽവേ സ്‌റ്റേഷനിലെ രണ്ടാം നമ്പർ പ്ലാറ്റ്‌ഫോമിൽ നിന്നാണ് മൊബൈൽ ഫോൺ മോഷണം പോയത്. ശബരി എക്‌സ്പ്രസിലെ യാത്രക്കാരന്റേതായിരുന്നു ഫോൺ. പരാതി ലഭിച്ചതിന് പിന്നാലെ പൊലീസ് വ്യാപക പരിശോധന ആരംഭിച്ചു. സി.സി.ടി.വി ക്യാമറ ദൃശ്യങ്ങളിൽ നിന്ന് പ്രതിയെ കണ്ടെത്തി. തുടർന്ന് മഫ്തിയിൽ നാഗമ്പടം ബസ് സ്റ്റാൻഡിലും റെയിൽവേ സ്റ്റേഷൻ പരിസരങ്ങളിലും പരിശോധന നടത്തി അറസ്റ്റ് ചെയ്തു. ഫോണും കണ്ടെടുത്തു. ഗ്രേഡ് എസ്.ഐ സന്തോഷ്, ഉദയൻ, സിവിൽ പൊലീസ് ഓഫിസർ അബിൻ എന്നിവരും സംഘത്തിലുണ്ടായിരുന്നു.