കോട്ടയം : എം.ആർ.പിയേക്കാൾ 30 ശതമാനം വരെ വിലക്കുറവ്, ഈ ബോർഡ് കണ്ട് ആരും മെഡിക്കൽ സ്റ്റോറിലേക്ക് പോകേണ്ട. വിലക്കിഴിവ് മരുന്നിലില്ല. കച്ചവടംകൂട്ടാനുള്ള ഈ തന്ത്രത്തിന് കൂച്ചു വിലങ്ങിടുകയാണ് ഡ്രഗ്സ് കൺട്രോൾ വിഭാഗം. ഹൈക്കോടതി നിർദ്ദേശത്തിലാണ് നടപടി. മരുന്നുകളുടെ വിലവിവരപ്പട്ടിക എല്ലാവർക്കും കാണുംവിധം പ്രദർശിപ്പിക്കാൻ മെഡിക്കൽ സ്റ്റോറുകൾക്ക് നോട്ടീസ് നൽകി. വിലകുറച്ചു കൊടുക്കുന്ന മരുന്നുകളുടെ വിശദാംശങ്ങൾ,​ എത്ര ശതമാനം ഡിസ്കൗണ്ട് എന്നിവ ഉൾപ്പെടുത്തണം. ജില്ലയിലെ പ്രധാന ആശുപത്രികളുടെ മുന്നിലുള്ള മെഡി.സ്റ്റോറുകളിലായിരുന്നു തട്ടിപ്പ് കൂടുതൽ. നിരവധി ആളുകൾ മരുന്നു വാങ്ങുമെങ്കിലും കാര്യമായ ഇളവ് ലഭിക്കാറില്ല. ഈ സാഹചര്യത്തിലായിരുന്നു കോടതി ഇടപെടൽ.

നടപ്പാക്കേണ്ടത് 7 ദിവസത്തിനകം

ഏഴ് ദിവസത്തിനകം സ്വീകരിച്ച നടപടികൾ മെഡിക്കൽ സ്റ്റോറുകൾ രേഖാമൂലം ഡ്രഗ്സ് ഇൻസ്പെക്ടർക്ക് കൈമാറണം. അല്ലാത്തപക്ഷം കർശന നടപടികളിലേക്ക് നീങ്ങാനാണ് അധികൃതരുടെ തീരുമാനം.

'' തീരുമാനം സ്വാഗതാർഹമാണ്. മെഡിക്കൽ സ്റ്റോറുകൾ സഹകരിക്കും.

-ജില്ലാ പ്രസിഡന്റ്, ആൾ കേരള കെമിസ്റ്റ്സ് ആൻഡ് ഡ്രഗ്സ് ഓസോ.

ഗുണം മെഡിക്കൽ സ്റ്റോറുകൾക്ക് മാത്രം

 ഡിസ്കൗണ്ട് ഓഫർ കണ്ട് കൂടുതൽപ്പേർ മരുന്ന് വാങ്ങും

 വിലകൂടിയ മരുന്നുകൾക്ക് കാര്യമായ വിലക്കുറവില്ല

 വിലവ്യത്യാസം ആരും കണക്ക് കൂട്ടി നോക്കുന്നില്ല