കോട്ടയം: റോഡരികിൽ മാലിന്യം തള്ളി തടിതപ്പാൻ ശ്രമിച്ച സാമൂഹ്യവിരുദ്ധരെ പഞ്ചായത്ത് അധികൃതരും നാട്ടുകാരും ചേർന്ന് പിടികൂടി. മാലിന്യം മുഴുവൻ തിരികെ ലോറിയിലേക്ക് കയറ്റി. കാണക്കാരി ഗ്രാമപഞ്ചായത്ത് പത്താം വാർഡിലാണ് സംഭവം. എം.സി റോഡരികിൽ ലോറിയിൽ കൊണ്ടുവന്ന മാലിന്യം തളളുന്നത് ശ്രദ്ധയിൽപ്പെട്ട ഹരിത കർമ്മ സേനാംഗങ്ങളായ വിജിനി, സുജാത, മിനി എന്നിവർ ചേർന്ന് ലോറി തടഞ്ഞുനിർത്തുകയും പഞ്ചായത്ത് അധികൃതരെ വിവരം അറിയിക്കുകയും ചെയ്തു. തുടർന്ന് നാട്ടുകാരും പഞ്ചായത്ത് അധികൃതരും സ്ഥലത്തെത്തി മാലിന്യം നിക്ഷേപിച്ചവരെക്കൊണ്ട് തിരികെ ലോറിയിൽ കയറ്റി നിർമ്മാർജ്ജനം ചെയ്യിപ്പിച്ചു. കാണക്കാരി ഗ്രാമപഞ്ചായത്ത് പ്രസിഡന്റ് അംബിക സുകുമാരൻ, വൈസ് പ്രസിഡന്റ് ബിജു പഴയപുരയ്ക്കൽ, സ്റ്റാൻഡിംഗ് കമ്മറ്റി ചെയർപേഴ്‌സൺമാരായ ലൗലിമോൾ വർഗീസ്, വിനീത രാഗേഷ്, കാണക്കാരി എഫ്.എച്ച്.സി മെഡിക്കൽ ഓഫീസർ ഡോ.മെർലിൻ ആൻ ജോർജ്ജ്, സെക്രട്ടറി എം.എസ് ഷൈനി, അസി.സെക്രട്ടറി പ്രിൻസ് ജോർജ്ജ്, എച്ച്.ഐ ഷിജു വി.കുര്യൻ, പഞ്ചായത്തംഗങ്ങളായ തമ്പി ജോസഫ്, അനിത പി.മോഹൻ, ബെറ്റ്‌സി മോൾ ജോഷി, ജൂനിയർ ഹെൽത്ത് ഇൻസ്‌പെക്ടർമാരായ അരുൺ എം.നായർ, എം.തുളസി, അജി ജോസഫ് എന്നിവർ സ്ഥലത്തെത്തി.

കാണക്കാരി ഗ്രാമപഞ്ചായത്ത് പ്രദേശത്ത് മാലിന്യം തള്ളുന്നവർക്കെതിരെ ശക്തമായ നടപടികൾ സ്വീകരിക്കും. (അംബിക സുകുമാരൻ കാണക്കാരി ഗ്രാമപഞ്ചായത്ത് പ്രസിഡന്റ്)