പാലക്കാട്: അയൽവാസിയുടെ പൂവൻ കോഴികൾ കൂവുന്നത് കാരണം ഉറക്കം നഷ്ടമാകുന്നുവെന്ന വീട്ടമ്മയുടെ പരാതിയിൽ ചർച്ച നടത്തി ഷൊർണൂർ നഗരസഭ. പത്താം വാർഡിൽ നിന്നും നഗരസഭയ്ക്ക് ലഭിച്ച പരാതിയും തുടർനടപടികളുമാണ് കൗൺസിൽ യോഗത്തിലും ദീർഘ ചർച്ചയായത്.
അയൽവാസിയുടെ വീട്ടിലെ കോഴി കൂവൽ അസഹ്യം, ഉറങ്ങാനാവുന്നില്ല, കൂട് വൃത്തിയായി സൂക്ഷിക്കുന്നില്ല എന്നെല്ലാമാണ് ഷൊർണൂർ നഗരസഭയിലെ കാരക്കാട് വാർഡ് കൗൺസിലർക്ക് മുന്നിൽ വീട്ടമ്മ നൽകിയ പരാതി.
വീട്ടമ്മയുടെ പരാതിയിൽ നഗരസഭ ആരോഗ്യവിഭാഗം ഉടനടി നടപടിയുമെടുത്തു. എതിർകക്ഷിയുടെ വീട്ടിലെത്തി കോഴിക്കൂട് വൃത്തിയായി സൂക്ഷിക്കാനായിരുന്നു നിർദേശം നൽകിയത്. എന്നാൽ കൂവലിന്റെ കാര്യത്തിൽ ഇതുവരെ പരിഹാരമായിട്ടില്ല. പിന്നാലെ വീട്ടമ്മ വീണ്ടും പരാതിയുമായെത്തി. തുടർന്ന് വിഷയം വാർഡ് കൗൺസിലർ കൗൺസിൽ യോഗത്തിൽ തന്നെ ഉന്നയിച്ചു.
ഭരണപക്ഷവും പ്രതിപക്ഷവും അജണ്ടയിലില്ലാത്ത ചർച്ച ഒരേ സ്വരത്തിൽ ഏറ്റെടുത്തു. കോഴി കൂവുന്നതിന് നമുക്കെന്ത് ചെയ്യാൻ പറ്റുമെന്ന രീതിയിൽ ചർച്ച വഴിമാറിയെങ്കിലും സ്ഥലത്ത് പോയി റിപ്പോർട്ട് സമർപ്പിക്കാൻ ആരോഗ്യ വിഭാഗത്തോട് നഗരസഭാദ്ധ്യക്ഷൻ ആവശ്യപ്പെടുകയാണ് ഉണ്ടായത്. കൂടാതെ പരിഹാരമുണ്ടാക്കാമെന്ന് കൗൺസിലർക്ക് ഉദ്യോഗസ്ഥരുടെ ഉറപ്പും.