കൊച്ചി: മകന്റെ പിറന്നാളാഘോഷത്തിന് വാങ്ങിയ ബലൂണിൽ 'ഐ ലവ് യു പാകി​സ്ഥാൻ' എന്ന എഴുത്തും പതാകയും കണ്ടതായി എരൂർ സ്വദേശിയായ യുവാവ് നൽകിയ വിവരത്തെ തുടർന്ന് തൃപ്പൂണിത്തുറ ഹിൽപാലസ് പൊലീസ് കേസെടുത്ത് അന്വേഷണം തുടങ്ങി.

തൃപ്പൂണിത്തുറ എരൂർ ചേലേക്കവഴി​യി​ൽ അടുത്തിടെ ​ കാസർകോട് സ്വദേശി തുടങ്ങിയ കടയിൽ നിന്ന് വാങ്ങിയ ബലൂണുകളി​ൽ ഒന്നിലായിരുന്നു ഇത്. ഈ കടയും തൊട്ടടുത്ത് ആലുവ ഉളി​യന്നൂർ സ്വദേശി തുടങ്ങിയ കടയും സംഭവത്തെ തുടർന്ന് അടച്ചു. ഇവി​ടേക്ക് ഇന്നലെ വൈകിട്ട് ബി.ജെ.പി പ്രവർത്തകർ പ്രതിഷേധ പ്രകടനം നടത്തി.

തിങ്കളാഴ്ചയാണ് ബലൂണുകൾ വാങ്ങിയത്. വീട്ടിലെത്തി വീർപ്പിച്ച് നോക്കിയപ്പോഴാണ് വെളുത്ത ബലൂണിൽ എഴുത്ത് ശ്രദ്ധയിൽപ്പെട്ടത്. പതാകയും പതിപ്പിച്ചിരുന്നു. ഉടൻ പൊലീസിനെ വിവരം അറിയിച്ചു. പൊലീസ് കടയിലുണ്ടായിരുന്ന ബലൂണുകളെല്ലാം കസ്റ്റഡിയിലെടുത്തു. കടക്കാരനെതി​രെ കേസെടുത്തി​ട്ടി​ല്ല. കുന്നംകുളത്ത് നിന്ന് മൊത്തമായി വാങ്ങിയതാണ് ബലൂണുകളെന്ന് വ്യാപാരി മൊഴി നൽകി. ബലൂൺ പാക്കറ്റിൽ നിർമ്മാതാവിന്റെ വിവരങ്ങൾ ഇല്ലെന്ന് പൊലീസ് പറഞ്ഞു.