ബാങ്കോക്ക്: തായ്‌ലൻഡിൽ പേതോംഗ്‌താൻ ഷിനവത്രയെ (37) പ്രധാനമന്ത്രിയായി തിരഞ്ഞെടുത്തു. രാജ്യത്തിന്റെ ചരിത്രത്തിലെ ഏറ്റവും പ്രായം കുറഞ്ഞ പ്രധാനമന്ത്രിയാണ് മുൻ പ്രധാനമന്ത്രി തക്‌സിൻ ഷിനവത്രയുടെ മകളായ പേതോംഗ്‌താൻ. 2001ൽ തായ്‌ലൻഡ് പ്രധാനമന്ത്രിയായിരുന്ന തക്‌സിൻ 2006ലെ സൈനിക അട്ടിമറിയിലൂടെയാണ് പുറത്താക്കപ്പെട്ടത്. തായ് പ്രധാനമന്ത്രി പദത്തിലെത്തുന്ന രണ്ടാമത്തെ വനിതയാണ് പേതോംഗ്‌താൻ. പേതോംഗ്‌താനിന്റെ പിതൃസഹോദരി യിംഗ്‌ലക്ക് ഷിനവത്രയാണ് ആദ്യ വനിതാ പ്രധാനമന്ത്രി. മുൻ പ്രധാനമന്ത്രി സ്രേത്ത തവിസിനെ ബുധനാഴ്ച ഭരണഘടനാ കോടതി പുറത്താക്കിയിരുന്നു. ജയിൽ ശിക്ഷ അനുഭവിച്ച മുൻ അഭിഭാഷകനെ മന്ത്രി സ്ഥാനത്ത് നിയമിച്ചതിലൂടെ ഭരണഘടനാ ലംഘനം നടത്തിയെന്ന് കാട്ടിയായിരുന്നു നടപടി. പിന്നാലെ ഇന്നലെ പാർലമെന്റിൽ നടന്ന തിരഞ്ഞെടുപ്പിൽ 319 വോട്ട് നേടിയാണ് പേതോംഗ്‌താനിന്റെ ജയം. ഭരണ സഖ്യത്തിൽ നിന്ന് പേതോംഗ്‌താന് മറ്റ് എതിരാളികൾ ഉണ്ടായിരുന്നില്ല. പേതോംഗ്‌താൻ ഈ മാസം ചുമതലയേറ്റെടുക്കും. ഫ്യൂ തായ് പാർട്ടി നേതാവായ പേതോംഗ്‌താൻ ഇതിന് മുന്നേ സർക്കാർ പദവികളൊന്നും വഹിച്ചിട്ടില്ല. കഴിഞ്ഞ ഒക്ടോബറിൽ പാർട്ടിയുടെ നേതൃസ്ഥാനം ഏറ്റെടുത്തു. സാമ്പത്തിക പ്രതിസന്ധി മുതൽ വർഷങ്ങളായി രാജ്യത്ത് തുടരുന്ന രാഷ്ട്രീയ പ്രതിസന്ധി അടക്കം നിരവധി വെല്ലുവിളികളാണ് ബിസിനസുകാരിയായ പേതോംഗ്‌താന് മുന്നിലുള്ളത്.