താരൻ, മുടി കൊഴിച്ചിൽ, നര എന്നിവ മിക്കവരെയും അലട്ടുന്ന പ്രശ്നമാണ്. പ്രായമാകുന്നതിനനുസരിച്ച് മുടി നരയ്ക്കാറുണ്ടെങ്കിലും കൗമാര പ്രായത്തിൽ തന്നെ നര വരുന്നത് പലരിലും മാനസികമായും സമ്മർദ്ദമുണ്ടാക്കുന്നു. നരമാറാൻ കൂടുതൽ പേരും ആശ്രയിക്കുന്നത് കൃത്രിമ ഡൈകളെയാണ്, എന്നാൽ ഇത് മുടിയുടെ ആരോഗ്യത്തെയും ശാരീരിക ആരോഗ്യത്തെയും ബാധിച്ചേക്കാം. എന്നാൽ മുടി വളർച്ച കൂടാനും നര മാറുന്നതിനും ചില പ്രകൃതിദത്ത വഴികളുണ്ട്. ഈ ആയുർവേദ ഡൈ തയ്യാറാക്കുന്നത് എങ്ങനെയെന്നും ആവശ്യമുള്ള സാധനങ്ങൾ എന്തൊക്കെയെന്നും നോക്കാം.
ആവശ്യമായ സാധനങ്ങൾ
കടുക് - 6 ടേബിൾസ്‌പൂൺ
കറിവേപ്പില - ഒരു പിടി
വെളിച്ചെണ്ണ - ആവശ്യത്തിന്
തയ്യാറാക്കുന്ന വിധം
ഒരു പാത്രി ചൂടാക്കി അതിലേക്ക് കടുകിട്ട് നന്നായി വറുത്തെടുക്കുക. ഫ്ലെയിം കുറച്ച് വയ്‌ക്കാൻ പ്രത്യേകം ശ്രദ്ധിക്കണം. കടുക് പൊട്ടി നല്ല കറുപ്പ് നിറമാകുന്നത് വരെ വറുക്കണം. ശേഷം ഇതിലേക്ക് കഴുകി ഉണക്കി വച്ചിരിക്കുന്ന കറിവേപ്പില ചേർക്കണം. ശേഷം ഇതും നന്നായി വറുത്തെടുക്കണം. കയ്യിലെടുത്താൽ കറിവേപ്പില പൊടിഞ്ഞുവരുന്ന പരുവമെത്തുമ്പോൾ സ്റ്റൗ ഓഫ് ചെയ്യുക. ചൂട് പൂർണമായും മാറുമ്പോൾ പൊടിച്ചെടുക്കുക. ശേഷം തരി ഇല്ലാതെ അരിച്ചെടുക്കണം. ഇതിനെ നല്ല വൃത്തിയുള്ള ബോട്ടിലിൽ അടച്ച് ഏറെനാൾ സൂക്ഷിക്കാനാകും.
ഉപയോഗിക്കേണ്ട വിധം
തയ്യാറാക്കി വച്ച ഡൈ പൗഡർ ആവശ്യത്തിനെടുത്ത് വെളിച്ചെണ്ണ ചേർത്ത് നന്നായി യോജിപ്പിക്കുക. ഷാംപൂ ഉപയോഗിച്ച് നന്നായി വൃത്തിയാക്കിയ മുടിയിലേക്ക് വേണം ഡൈ പുരട്ടിക്കൊടുക്കാൻ. ആദ്യം ആഴ്‌‌ചയിൽ മൂന്നു തവണ ഉപയോഗിക്കുക. പിന്നീട് മുടി നന്നായി കറുക്കുമ്പോൾ മാസത്തിൽ ഒരു തവണ ചെയ്‌താൽ മതിയാകും.