തിരുവനന്തപുരം: സിനിമയിൽ പവർഗ്രൂപ്പുകളുണ്ടെന്നും ഇല്ലെന്ന് പറയാൻ മണ്ടൻ ആയിരിക്കണമെന്നും നടനും ബിജെപി നേതാവുമായ കൃഷ്‌ണകുമാർ. സിനിമയിൽ എക്കാലത്തും പവർഗ്രൂപ്പുകൾ ഉണ്ട്. പണ്ട് ഇത് പലവിധ ലോബികൾ ആയിരുന്നു. സിനിമയിൽ പണിയെടുക്കുന്ന ബഹുഭൂരിപക്ഷം പേരും നല്ലവരാണ്. എന്നാൽ പുഴുക്കുത്തുകളുമുണ്ട്. ഈ പുഴുക്കുത്തുകൾ പക്ഷെ ശക്തരാണ്.
സിനിമയിൽ പവർഗ്രൂപ്പുകൾ എന്ന പോലെ വളരെയധികം സക്‌സസ്‌ഫുൾ ആയിനിൽക്കുന്നവരുമുണ്ട്. അവരെ ചീത്തപറയാൻ തനിക്ക് ഇഷ്‌ടമല്ലെന്ന് വെളിപ്പെടുത്തിയ കൃഷ്‌ണകുമാർ പവർഗ്രൂപ്പുകൾ ഇല്ലെന്ന് പറയുന്നവർ മണ്ടന്മാരോ ആരെയെങ്കിലും സോപ്പിട്ട് നിൽക്കുന്നവരോ ആകാമെന്ന് സൂചിപ്പിച്ചു.
വളരെ മികച്ചതും ആഴമേറിയതുമാണ് ഹേമ കമ്മിറ്റി റിപ്പോർട്ട് എന്ന് പറഞ്ഞ നടൻ അതിശക്‌തമായ നടപടിയിലേക്ക് പോയാൽ മാത്രമേ സിനിമാ മേഖലയിൽ നിയന്ത്രണം ഉണ്ടാകൂ എന്നും അഭിപ്രായപ്പെട്ടു. മഹാഭൂരിപക്ഷമുള്ള സർക്കാർ നടപടി എടുക്കട്ടെ. ഇപ്പോൾ തുടക്കം കുറിച്ചില്ലെങ്കിൽ സ്ഥിതി രൂക്ഷമാകും.
പവർഗ്രൂപ്പുകൾ ശക്തരാണ് എന്നാൽ ഇവരുടെ പ്രവർത്തനം ഇൻവിസിബിളാണ്. കൊടുക്കൽ വാങ്ങലുകളാണ് പലപ്പോഴും മേഖലയിൽ. കിട്ടാതെ വരുമ്പോൾ പോയി പരാതിപ്പെടുകയാണ്. മേഖലയിൽ 50 ശതമാനത്തിലധികം ഫേക്ക് കേസുകളുമുണ്ട്.