തിരുവനന്തപുരം: അധിനിവേശവും യുദ്ധവെറിയും ഏകാധിപത്യവും മാനവരാശിയ്ക്ക് ഉയർത്തുന്ന ഭീഷണികൾ തുറന്നുകാട്ടി കോട്ടൺഹിൽ ഹൈസ്കൂൾ വിദ്യാർത്ഥികൾ അവതരിപ്പിച്ച 'അതിരുകൾ മാറ്റി വരയ്ക്കുന്നവർ' എന്ന നാടകം ശ്രദ്ധേയമായി. സാമ്രാജ്യത്വം മൂന്നാംലോക രാജ്യങ്ങളിലെ നിസ്സഹായരായ ജനതയെ ചതുരംഗക്കളത്തിൽ വെട്ടിമരിക്കാൻ വിധിക്കപ്പെട്ട കരുക്കളാക്കുന്നതും ഏകാധിപത്യത്തോടുള്ള ജനതയുടെ ചെറുത്തുനിൽപ്പും അനന്യമായ ദൃശ്യഭാഷയിൽ അവതരിപ്പിച്ച നാടകം ചരിത്രത്തിൽപുരണ്ട ചോരയുടെ മണം ഇന്നും നിലനിൽക്കുന്നു എന്ന ഓർമ്മപ്പെടുത്തലായി.ഇരകളും ഇരപിടിയന്മാരും ചത്തൊടുങ്ങുന്ന യുദ്ധങ്ങൾക്കപ്പുറത്ത് ഭൂമിയിൽ പ്രതീക്ഷയുടെ പുതുനാമ്പുകൾ തളിർക്കുന്നിടത്താണ് നാടകം അവസാനിക്കുന്നത്.

ഹൈസ്കൂൾ വിദ്യാർഥികളായ അനസൂയ,അർക്കജ,നേഹ,ഗൗരി ലക്ഷ്മി,അദ്വൈത,മീനാക്ഷി,ഷാനി എന്നിവർ അരങ്ങിലെത്തി. ചാന്ദ്നി,ശിവാനി,ഉമ എന്നിവരായിരുന്നു പിന്നണിയിൽ.ബി.എം.ഷാജ് നിസാർ ആണ് നാടകം സംവിധാനം ചെയ്തത്.