മൂന്നാർ: തേയിലത്തോട്ടത്തിൽ ജോലി ചെയ്യുന്ന തൊഴിലാളികൾക്കിടയലേക്ക് പുലി ചാടി വീണത് പരിഭ്രാന്തി പരത്തി. പുലിയുടെ പിടിയിലകപ്പെടാതെ തൊഴിലാളികൾ ഓടി രക്ഷപ്പെടുകയായിരുന്നു. ഇന്നലെ രാവിലെ ഒമ്പതിന് കടലാർ എസ്റ്റേറ്റിലെ പത്താം നമ്പർ ഫീൽഡിലായിരുന്നു സംഭവം.

ഇവിടെ രണ്ട് ഭാഗത്തായി അമ്പതോളം തൊഴിലാളികളാണ് ജോലി ചെയ്തിരുന്നത്. തേയില ചെടികൾക്കിടയിലെ പുലിയുടെ സാന്നിദ്ധ്യം തൊഴിലാളികൾ അറിഞ്ഞില്ല. പുതുതായി തേയില തൈകൾ വച്ചുപിടിപ്പിച്ചു കൊണ്ടിരുന്ന ഏതാനും തൊഴിലാളികൾക്കിടയലേക്ക് പതുങ്ങിക്കിടന്ന പുലി ചാടി വീഴുകയായിരുന്നു. തൊഴിലാളികൾ ഭയന്നോടിയതോടെ വിറളി പിടിച്ച പുലി തേയില തോട്ടത്തിനിടയിലൂടെ പരക്കം പാഞ്ഞു. പിന്നീട് പുലി സമീപത്തെ കാട്ടലേക്ക് ഓടപ്പോയി. സംഭവത്തിൽ ആർക്കും പരക്കേറ്റില്ല.

കഴിഞ്ഞദിവസം ജില്ലയിൽ ഒരു ഇടവേളയ്ക്ക് ശേഷം ജനവാസ മേഖലയിൽ കാട്ടാനക്കൂട്ടങ്ങൾ ഇറങ്ങിയിരുന്നു. വ്യാപകമായ തോതിൽ കൃഷികൾ നശിപ്പിച്ചു.വള്ളക്കടവ് അമ്പലപ്പടി മുല്ലൂപറമ്പിൽ മുരളിധരന്റെ പറമ്പിലെ കൃഷിയാണ് കൂടുതലും നശിപ്പിച്ചത്. മറ്റുള്ളവരുടെ പറമ്പിൽ കാട്ടാനക്കൂട്ടങ്ങൾ കയറിയെങ്കിലും കൂടുതൽ നാശങ്ങൾ ഉണ്ടായില്ല.

ചൊവ്വാഴ്ച്ച പുലർച്ചെ രണ്ടരയോടെയാണ് കാട്ടാനക്കൂട്ടങ്ങൾ എത്തിയത്. പെരിയാർ കടുവാ സങ്കേതത്തിന്റെ അതിർത്തിയാണ് വള്ളക്കടവ് . അതിർത്തിയിൽ നിന്ന് പെരിയാർ നദി കടന്ന് അമ്പലപ്പടി റോഡിൽ കാട്ടാനക്കൂട്ടങ്ങൾ എത്തി. അവിടന്ന് വഞ്ചി വയൽ സ്‌കൂളിന് സമീപമെത്തി. കട്ടാനക്കൂട്ടങ്ങൾ വന്ന തറിഞ്ഞ് ഫോറസ്റ്റ് ഉദ്യോഗസ്ഥർ സ്ഥലത്തെത്തി പടക്കം പൊട്ടിച്ചങ്കിലും കാട്ടാനകൾ പിൻവാങ്ങിയില്ല.

കാട്ടാനക്കൂട്ടങ്ങൾ മുരളീധരന്റെ കൃഷിയിടത്തിൽ എത്തി വെട്ടാൻ പാകത്തിന് നിന്ന നിരവധിയായ കുലച്ച വാഴകൾ വ്യാപകമായി നശിപ്പിച്ചു. ഓണത്തിനോടനുബന്ധിച്ച് വിളവെടുക്കാൻ നിർത്തിയതായിരുന്നു.
അരയേക്കറോളം വാഴക്കൃഷികൾ കാട്ടാനക്കൂട്ടങ്ങൾ നശിപ്പിച്ചു. സമീപ പ്രദേശത്ത് ശോഭന , സാംകുട്ടി,മണ്ണൂശ്ശേരി ഷാജി, എന്നിവരുടെ കൃഷികളും കാട്ടാനക്കൂട്ടങ്ങൾ നശിപ്പിച്ചു.

വനപാലകരും നാട്ടുകാരും ബഹളം വച്ചതിനെ തുടർന്ന് രാവിലെ ആറോടെ കട്ടാനക്കൂട്ടങ്ങൾ റോഡ് മുറിച്ച് കടന്ന് കാട്ടിലേയ്ക്ക് മടങ്ങി. റോഡ് മുറിച്ച് കടക്കുമ്പോൾ അയ്യപ്പവിലാസം വീട്ടിൽ ലീലാമ്മ നാരയണന്റെ വീടിന്റെ മതിൽ കടന്നാണ് കാട്ടാനക്കൂട്ടങ്ങൾ കാട്ടിലേയ്ക്ക് മടങ്ങിയത്.ഒരു കുട്ടിയും കൊമ്പനും അടങ്ങിയ അഞ്ചംഗം സംഘമായിരുന്നു. കാട്ടാനക്കൂട്ടത്തിന്റേത്.