റാന്നി: വലിയ പതാൽ പ്രദേശത്തെ ഡിജിറ്റൽ റീസർവേനടപടികൾ അഡ്വ പ്രമോദ് നാരായൺ എം.എൽ.എ ഉദ്ഘാടനം ചെയ്തു. ചേത്തയ്ക്കൽ വില്ലേജിൽ സർവേ നമ്പർ 781, 799 എന്നിവിടങ്ങളിലായി കിടക്കുന്ന 220 കൈവശ കർഷകർക്ക് പട്ടയം നൽകുന്നതിന് മുന്നോടിയാണ് സർവേ നടപടികൾ ആരംഭിച്ചത്. ഇത് സംബന്ധിച്ച് എം.എൽ.എ നാല് തവണയാണ് നിയമസഭയിൽ സബ്മിഷൻ ഉന്നയിച്ചത് - തുടർന്ന് റവന്യൂ വകുപ്പ് മന്ത്രി കെ രാജന്റെ നേതൃത്വത്തിൽ പല തവണ യോഗം ചേർന്നാണ് പെരുമ്പെട്ടി, വെച്ചൂച്ചിറ എക്സ് സർവീസ് മെൻ കോളനി, വലിയ പതാൽ എന്നിവിടങ്ങളിലെ പട്ടയ നടപടികൾ ദ്രുതഗതിയിൽ ആക്കുന്നതിനായി ഡിജിറ്റൽ സർവേ നടത്താൻ തീരുമാനിച്ചത്. റവന്യൂ വകുപ്പ് ജോ.കമ്മീഷണർ ഗീതയുടെ ചുമതലയിൽ പ്രത്യേക സംഘത്തെ നിയോഗിച്ചാണ് പട്ടയ വിതരണ നടപടികൾ വേഗത്തിൽ ആക്കിയിരിക്കുന്നത്. സർവേ വകുപ്പ് ഹെഡ് സർവേയർ അബ്ദുൽ നഹയുടെ നേതൃ ത്വത്തിൽ സർവേ ടീമാണ് സർവേ നടത്തുന്നത്. താലൂക്ക് സർവേയർ മനോജ്മോൻ, വില്ലേജ് ഓഫീസർ പി.ആർ രാജേഷ് എന്നിവർ ഒപ്പമുണ്ട്.