മല്ലപ്പള്ളി: കോട്ടാങ്ങൽ, ആനിക്കാട് പഞ്ചായത്തുകളെ ബന്ധിപ്പിക്കുന്ന മണിമലയാറ്റിലെ തേലപ്പുഴക്കടവിലെ തൂക്കുപാലത്തിലും തൂണുകളിലും തുരുമ്പ് വ്യാപിക്കുന്നു. ആനിക്കാട് പഞ്ചായത്ത് കരയുടെ ഭാഗത്ത് കാടുംവളർന്നത് യാത്രയ്ക്കു തടസമാകുന്നതായി പരാതിയുണ്ട്. 2012ൽ നിർമ്മിച്ച് പാലത്തിന്റെ

തൂണുകളിലും പ്രധാനപ്പെട്ട ഇരുമ്പ് കമ്പികളിലും ആളുകളുടെ സുരക്ഷയ്ക്കായി ഇരുവശങ്ങളിലും

സ്ഥാപിച്ചിരിക്കുന്ന ഇരുമ്പ് പട്ടകളിലും തുരുമ്പ് വ്യാപിച്ചു തുടങ്ങി. ഇരുമ്പ് കയർ ബന്ധിപ്പിച്ചിരിക്കുന്ന തൂണുകളിലെ പെയിന്റിംഗും ഇളകിത്തുടങ്ങി.തൂക്കുപാലം ആദ്യസമയങ്ങളിൽ അവഗണിക്കപ്പെട്ടെങ്കിലും 2017ൽ ജില്ലാ പഞ്ചായത്തിൽ നിന്നുള്ള തുക വിനിയോഗിച്ച് മിനുക്കുപണികൾ നടത്തിയിരുന്നു. പിന്നീട് കാര്യമായ പുനരുദ്ധാരണ പ്രവൃത്തികൾ നടത്താതെ അവഗണിക്കപ്പെട്ട സ്ഥിതിയാണ്. 122 മീറ്റർ നീളവും 1.20 മീറ്റർ വീതിയുമുള്ള തുക്കുപാലം ദുരന്തനിവാരണ പദ്ധതിയിൽപെടുത്തി 85,20,672 രൂപചെലവഴിച്ചാണ് നിർമ്മിച്ചത്. ആനിക്കാട് പഞ്ചായത്ത് കരയോടുചേർന്നുള്ള ഭാഗത്ത് തൂക്കുപാലത്തിലേക്കു മുളകൾ വളർന്നു പന്തലിക്കാൻ തുടങ്ങി. ഇത് വെട്ടിത്തെളിക്കണമെന്ന ആവശ്യം ശക്തമാണ്. പ്രവേശനകവാടത്തിലും കാട് വളർന്നു. ഇഴജന്തുക്കളെ ഭയന്നുവേണം പാലത്തിലേക്കു പ്രവേശിക്കാനെന്ന് യാത്രക്കാർ പറയുന്നു. വായ്പൂര് ഗവ.എം.ആർ.എസ്എൽബി.വി ഹയർ സെക്കൻഡറി സ്കൂൾ, വായ്പൂര് എൻ.എസ്എസ് സ്കൂൾ എന്നിവിടങ്ങളിലേക്കുള്ള കുട്ടികൾ ഉൾപ്പെടെ ഒട്ടേറെ യാത്രക്കാരാണ് തൂക്കുപാലത്തെ ആശ്രയിക്കുന്നത്. കമ്പികളിൽ തുരുമ്പ് വ്യാപിച്ചതിനാൽ യാത്രക്കാർ ഭീതിയോടെയാണ്

അക്കരെയിക്കരെ കടക്കുന്നത്. ഇരുമ്പ് പട്ടകളിൽ തട്ടിയാൽ പരിക്കേൽക്കാൻ സാദ്ധ്യതയുണ്ട്. ജനങ്ങൾക്ക് ഏറെ പ്രയോജനപ്പെടുന്ന തൂക്കുപാലത്തിന്റെ അറ്റകുറ്റപ്പണികൾ എത്രയും പെട്ടന്ന് നടത്തണമെന്നാണ് നാട്ടുകാരുടെ ആവശ്യം.

...............................

ജനങ്ങളുടെ ആശങ്ക ഒഴിവാക്കുന്നതിനും പാലത്തിലേക്ക് പടന്നുകയറുന്ന കാടുകൾ നീക്കം ചെയ്ത് തൂക്കുപാലം നവീകരിക്കുന്നതിന് ജില്ലാപഞ്ചായത്തിൽ നിന്നും തുക അനുവദിക്കുന്നതിന് അടിയന്തര ഇടപെടിൽ നടത്തും.

ബിനു ജോസഫ്

പ്രസിഡന്റ്

(കോട്ടാങ്ങൽ പഞ്ചായത്ത് )​

തൂക്ക് പാലത്തിന് 122 മീറ്റർ നീളം

1.20 മീറ്റർ വീതി

2012ൽ നിർമ്മാണം

ചെലവ് 85,20,672 രൂപ