പത്തനംതിട്ട : സി.പി.എം. തിരുവല്ല ഏരിയാ കമ്മിറ്റി സെക്രട്ടറി അഡ്വ. ഫ്രാൻസിസ് വി. ആന്റണിയെ ചുമതലയിൽ നിന്ന് മാറ്റിനിറുത്തി. . ജില്ലാ കമ്മിറ്റി അംഗം പി.ബി സതീഷ് കുമാാറാണ് പുതിയ ഏരിയ സെക്രട്ടറി.

സംസ്ഥാന സെക്രട്ടറി എം.വി. ഗോവിന്ദൻ പങ്കെടുത്ത ഇന്നലത്തെ ജില്ലാ സെക്രട്ടേറിയറ്റ് യോഗത്തിലാണ് തീരുമാനം.

2020ലെ പഞ്ചായത്ത് തിരഞ്ഞെടുപ്പിൽ പാർട്ടി സ്ഥാനാർത്ഥിയെ തോല്പിക്കുന്നതിനായി ശ്രമിച്ചുവെന്ന കണ്ടെത്തലിന്റെ അടിസ്ഥാനത്തിലാണ് ഫ്രാൻസിസിനെതിരായ നടപടി. ' കടപ്ര പഞ്ചായത്ത് എട്ടാം വാർഡായ പരുമലയിലെ സിപിഎം സ്ഥാനാർത്ഥി മോളിക്കുട്ടിയെ തോൽപ്പിക്കാൻ പാർട്ടിയുടെ വോട്ടുകൾ എതിരാളിിക്ക് മറിച്ചതായാണ് ഫ്രാൻസിസിനെതിരായ ആരോപണം.

സി.പി.എം ശക്തി കേന്ദ്രത്തിൽ മോളിക്കുട്ടി 350 വോട്ടുകൾക്ക് പരാജയപ്പെട്ടു. സ്വന്തം സ്ഥാനാർത്ഥിക്കെതിരെ ഏരിയാ സെക്രട്ടറി പാർട്ടി പ്രവർത്തകയോട് ഫോണിൽ സംസാരിച്ചതിന്റെ ശബ്ദരേഖയടക്കം മേൽഘടകത്തിന് പരാതി നൽകിയിരുന്നു. ജില്ലാ കമ്മിറ്റി ഈ വിഷയത്തിൽ അന്വേഷണ കമ്മീഷനെ നിയോഗിച്ചിരുന്നു. പരുമല ഉഴത്തിൽ ബ്രാഞ്ച് അംഗമാണ് മോളിക്കുട്ടി. ഇവരെ അടക്കം ചില അംഗങ്ങളെ ഒരു മാസം മുമ്പ് ബ്രാഞ്ചിൽ നിന്ന് സസ്പെൻഡ് ചെയ്തിരുന്നു.