പത്തനംതിട്ട : ജില്ലാ കേന്ദ്രത്തിൽ പൊതുപരിപാടികൾക്ക് ഇടം ഒരുക്കാൻ നഗരസഭ നിർമ്മിക്കുന്ന ടൗൺ സ്‌ക്വയറിന് വിശദ രൂപരേഖ തയ്യാറായി. സുപ്രീം കോടതി പ്രഥമ വനിതാ ജഡ്ജി ജസ്റ്റിസ് ഫാത്തിമ ബീവിക്കും, ജില്ലയുടെ പിതാവ് കെ കെ നായർക്കും ടൗൺ സ്‌ക്വയറിൽ സ്മാരകങ്ങൾ ഒരുങ്ങും. നഗരസഭ ചെയർമാൻ അഡ്വ. ടി. സക്കീർ ഹുസൈന്റെ നേതൃത്വത്തിൽ നടന്ന യോഗത്തിൽ ടൗൺ സ്‌ക്വയറിന്റെ ഡി.പി.ആറിന് അന്തിമരൂപം നൽകി. അബാൻ മേൽപ്പാല നിർമ്മാണത്തിനായി പുതിയ ബസ് സ്റ്റാൻഡിന് സമീപമുള്ള കെ.കെ നായരുടെ പ്രതിമ നീക്കം ചെയ്യുന്നതിനെതിരെ നേരത്തെ പ്രതിഷേധം ഉയർന്നിരുന്നു. കെ.കെ.നായർക്ക് ഉചിതമായ സ്മാരകം നിർമ്മിക്കുമെന്ന് അന്ന് ചെയർമാൻ ഉറപ്പുനൽകിയിരുന്നു. ആർക്കിടെക്ട് ഷെയ്ക്ക് മുഹമ്മദ് യാസിനാണ് ടെൻഡർ. യോഗത്തിൽ നഗരസഭ ചെയർമാൻ അഡ്വ. ടി. സക്കീർ ഹുസൈൻ , കൗൺസിൽ അംഗങ്ങൾ, കെ കെ നായർ ഫൗണ്ടേഷൻ പ്രതിനിധികൾ, ജസ്റ്റിസിന്റെ മുൻ പ്രൈവറ്റ് സെക്രട്ടറി, ജില്ലാ ടൗൺ പ്ലാനർ, നഗരസഭാ സെക്രട്ടറി തുടങ്ങിയവർ പങ്കെടുത്തു.
മേൽപ്പാല നിർമ്മാണത്തിനായി നഗരസഭയുടെ ഓപ്പൺ സ്റ്റേജ് പൊളിച്ചുനീക്കിയതോടെ പൊതുസമ്മേളനങ്ങൾക്കും യോഗങ്ങൾക്കും നഗരത്തിൽ സ്ഥലം ഇല്ലാതായി. ടൗൺ കേന്ദ്രത്തിൽ ചെറിയ യോഗങ്ങൾ ഇപ്പോഴും നടക്കുന്നുണ്ടെങ്കിലും ഇവിടെയെല്ലാം ഹൈക്കോടതിയുടെ നിരോധനം നിലവിലുണ്ട്. ഈ സാഹചര്യത്തിലാണ് പൊതുപരിപാടികൾക്ക് പ്രത്യേക ഇടം നിർമ്മിക്കാൻ നഗരസഭ തീരുമാനിച്ചത്.
1000 പേർക്കിരിക്കാം
@ വൈകുന്നേരങ്ങളിൽ വിശ്രമിക്കാനുള്ള സൗകര്യം.
@ ക്രമീകരിക്കാൻ കഴിയുന്ന തുറന്ന സ്റ്റേജ്
@ അംഗപരിമിതർക്കും ഉപയോഗിക്കാം.
പരിസ്ഥിതി സൗഹൃദ കാഴ്ചപ്പാട് കൂടി ഉൾക്കൊള്ളിച്ചു കൊണ്ടുള്ള പദ്ധതിയാണ് നടപ്പാക്കുന്നത്.
അഡ്വ. ടി. സക്കീർ ഹുസൈൻ
നഗരസഭ ചെയർമാൻ