റാന്നി: വെച്ചൂച്ചിറ എണ്ണൂറാം വയൽ സി.എം.എസ് എൽ പി സ്കൂളിലെ കുട്ടികൾ വയനാട്ടിലെ കൂട്ടുകാർക്കായി സമാഹരിച്ചത് അരലക്ഷം രൂപയും സ്നേഹക്കൂടകളും.സമാഹരിച്ച അമ്പതിനായിരം രൂപ മുഖ്യമന്ത്രിയുടെ ദുരിതാശ്വാസ നിധിയിലേക്ക് നൽകി. സമാഹരിച്ച തുകയും സ്നേഹക്കൂടകളും ജില്ലാ കളക്ടർ എസ്. പ്രേംകൃഷ്ണൻ ഐ.എ.എസ്സിന് സ്കൂൾ ലീഡർ മുഹമ്മദ്‌ മുസ്തഫ വിദ്യാർത്ഥി പ്രതിനിധികളായ ധനേഷ് കുമാർ, അദ്വിക് ദിപിൻ,വൈഷ്ണവ്, ആരോൺ,ദിയ വിനോദ്, ഗോപിക എച്ച് നായർ, എൽസ എസ് അനീഷ് എന്നിവർ ചേർന്ന് കൈമാറി. മാസങ്ങളായി സ്വരൂപിച്ച കുടുക്കകളിലെ നിക്ഷേപങ്ങളും സൈക്കിൾ വാങ്ങാനും പന്ത് വാങ്ങാനും പാവകൾ വാങ്ങാനുമൊക്കെ മാറ്റി വെച്ചിരുന്ന പണവുമാണ് കുട്ടികൾ വയനാട് ദുരന്തത്തിൽ ദുരിതത്തിലായ കൂട്ടുകാരെ സഹായിക്കുവാനായി സ്കൂളിൽ എത്തിച്ചത്.വയനാട്ടിലെ കൂട്ടുകാർക്ക് സമ്മാനിക്കുവാൻ കുട്ടികളൊരുക്കിയ സ്നേഹക്കൂടയിൽ കളിപ്പാട്ടങ്ങൾ, പഠനോപകരണങ്ങൾ, പുതിയ വസ്ത്രങ്ങൾ, ഗ്ലാസ്സുകൾ, പ്ളേറ്റുകൾ തുടങ്ങിയവയാണുള്ളത്.