പത്തനംതിട്ട : ആരോഗ്യമേഖലയിൽ മികച്ച പ്രവർത്തനങ്ങൾക്ക് സംസ്ഥാന സർക്കാരിന്റെ ആർദ്രം പുരസ്കാരങ്ങളിൽ ജില്ലയിലെ ഒന്നാംസ്ഥാനം കൊടുമൺ ഗ്രാമ പഞ്ചായത്തിന് ലഭിക്കും. അഞ്ച് ലക്ഷം രൂപയാണ് സമ്മാനത്തുക. രണ്ടാം സ്ഥാനം നേടിയ കോയിപ്രത്തിന് മൂന്ന് ലക്ഷം രൂപയും മൂന്നാംസ്ഥാനം നേടിയ മല്ലപ്പുഴശ്ശേരിക്ക് രണ്ടുലക്ഷം രൂപയും സമ്മാനം ലഭിക്കും. തദ്ദേശ സ്വയംഭരണ സ്ഥാപനങ്ങൾ ആരോഗ്യ മേഖലയിൽ ചെലവഴിച്ച തുക, സാന്ത്വന പരിചരണ പരിപാടികൾ, കായകൽപ്പ, ആരോഗ്യ മേഖലയുമായി ബന്ധപ്പെട്ട മറ്റ് പ്രവർത്തനങ്ങൾ എന്നിവ പരിഗണിച്ചാണ് പുരസ്കാരം നൽകുന്നത്. പ്രതിരോധ കുത്തിവയ്പ്പ്, വാർഡുതല പ്രവർത്തനങ്ങൾ മറ്റ് പ്രതിരോധ പ്രവർത്തനങ്ങൾ, നടപ്പിലാക്കിയ നൂതനമായ ആശയങ്ങൾ, പൊതു സ്ഥലങ്ങളിലെ മാലിന്യ നിർമ്മാർജ്ജനം എന്നിവയും പുരസ്‌കാരത്തിന് വേണ്ടി വിലയിരുത്തുന്ന ഘടകങ്ങളാണ്. ആരോഗ്യ മന്ത്രി വീണാജോർജാണ് അവാർഡുകൾ പ്രഖ്യാപിച്ചത്.

കോയിപ്രത്തിന് രണ്ടാംസ്ഥാനവും മല്ലപ്പുഴശേരിക്ക് മൂന്നാം സ്ഥാനവും