നടപടി​ കേരളകൗമുദി​ വാർത്തയെത്തുടർന്ന്

കൊല്ലം: ക്യു.എ.സി റോഡിൽ നിന്ന് കർബല- റെയിൽവേ സ്റ്റേഷൻ റോഡിലേക്കുള്ള നടപ്പാതയിൽ, ഒരുമാസമായി​ തുറന്നുകി​ടന്ന ഓടയ്ക്ക് സ്ളാബി​ട്ടു. ഇന്നലെയാണ് റെയിൽവേ ക്വാർട്ടേഴ്സിന് സമീപത്തെ വളവിലുള്ള ഓടമൂടിയത്. ഇവി​ടെ കാൽനടയാത്രക്കാർക്ക് ഉണ്ടാകുന്ന ബുദ്ധിമുട്ട് കേരളകൗമുദി കഴിഞ്ഞ ദിവസം വാർത്ത പ്രസിദ്ധീകരിച്ചതി​ന്റെ അടി​സ്ഥാനത്തി​ലാണ് നടപടി.

മഴക്കാലത്ത് ഇവി​ടെ വലിയതോതിൽ വെള്ളക്കെട്ട് രൂപപ്പെട്ടിരുന്നു. ഇതുപരിഹരിക്കാൻ പൊതുമരാമത്ത് വകുപ്പി​ന്റെ നേതൃത്വത്തിൽ കഴിഞ്ഞ ജൂണി​ലെ രണ്ടാമത്തെ ആഴ്ചയി​ലാണ് ഓടയിലെ ചെളികോരി അറ്റകുറ്റപ്പണികൾ ആരംഭിച്ചത്. എന്നാൽ തുറന്നിട്ട ഓട മൂടാൻ വേണ്ട നടപടി അധികൃതരുടെ ഭാഗത്തുനിന്ന് ഉണ്ടായില്ല. ഇടവിട്ട് പെയ്ത മഴ മൂലം പണി പുന:രാരംഭിക്കാൻ കഴിഞ്ഞി​ല്ലെന്നായി​രുന്നു അധികൃതരുടെ വി​ശദീകരണം.

വൃത്തി​യാകാതെ നടപ്പാത

നടപ്പാതയിൽ പലഭാഗത്തും പുല്ല് മൂടിയ നിലയിലാണ്. അരികുകളിലായി ചപ്പുചവറുകളും കൂടി​ക്കി​ടക്കുന്നു. പകൽ സമയത്തുപോലും ഭീതിയോടെയാണ് ആളുകൾ ഇതുവഴി പോകുന്നത്. വഴിയരികിൽ വാഹനങ്ങൾ പാർക്ക് ചെയ്യുന്നതിനാൽ റോഡിലേക്ക് ഇറങ്ങി നടക്കാനും കഴിയാത്ത അവസ്ഥയാണ്. സ്വകാര്യ ബസടക്കം നിരവധി വാഹനങ്ങളാണ് ഇതുവഴി കടന്നുപോകുന്നത്. പേരിനുപോലും നടപ്പാത വൃത്തിയാക്കാൻ അധികൃതർ തയ്യാറാകുന്നില്ലെന്നാണ് ഉയരുന്ന പരാതി