ചവറ: ഐതിഹാസികമായ സ്വാതന്ത്ര്യ സമരം രൂപപ്പെടുത്തിയ ജനാധിപത്യ മതനിരപേക്ഷതാ മൂല്യങ്ങൾ സംരക്ഷിക്കാൻ പുതുതലമുറ ജാഗ്രത പാലിക്കണമെന്ന് ഡി.സി.സി പ്രസിഡന്റ് പി.രാജേന്ദ്രപ്രസാദ് അഭിപ്രായപ്പെട്ടു.

കെ.പി.സി.സി വിചാർ വിഭാഗ് ജില്ലാ കമ്മിറ്റിയുടെ ആഭിമുഖ്യത്തിൽ ജില്ലയിലെ 11 നിയോജക മണ്ഡലം കേന്ദ്രങ്ങളിൽ ഹൈസ്കൂൾ വിദ്യാർത്ഥികൾക്കായി നടത്തുന്ന സ്വാതന്ത്ര്യ സമര ചരിത്ര ക്വിസ് സീസൺ 7ന്റെ ജില്ലാതല ഉദ്ഘാടനം ചവറയിൽ നിർവഹിക്കുകയായിരുന്നു അദ്ദേഹം.

കെ.പി.സി.സി വിചാർ വിഭാഗ് നിയോജക മണ്ഡലം ചെയർമാൻ റോസ് ആനന്ദ് അദ്ധ്യക്ഷനായി. ചവറ ബ്ലോക്ക് പഞ്ചായത്ത് പ്രസിഡന്റ് സന്തോഷ് തുപ്പാശേരി, ഐ.എൻ.ടി.യു.സി ജില്ലാ സെക്രട്ടറി ചവറ ഹരീഷ് കുമാർ, പന്മന ബ്ലോക്ക് കോൺഗ്രസ് കമ്മിറ്റി പ്രസിഡന്റ് മാമൂലയിൽ സേതുക്കുട്ടൻ, കെ.ഇ.ബൈജു, മഹിള കോൺഗ്രസ് സംസ്ഥാന സെക്രട്ടറി പ്രഭ അനിൽ തുടങ്ങിവർ സംസാരിച്ചു. കവിഅരങ്ങ് വിചാർ വിഭാഗ് ജില്ലാ ചെയർമാൻ ജി.ആർ.കൃഷ്ണകുമാർ ഉദ്ഘാടനം ചെയ്തു. കവി ആസാദ് ആശിർവാദ് അദ്ധ്യക്ഷനായി. എം.എൽ.എർമാരായ സി.ആർ.മഹേഷ്, പി.സി.വിഷ്ണുനാഥ്, എൻ.കെ.പ്രേമചന്ദ്രൻ എം.പി, യു.ഡി.എഫ് ജില്ലാ ചെയർമാൻ കെ.സി.രാജൻ, സൂരജ് രവി, പി.ഹരികുമാർ, പി.ആർ.സന്തോഷ്, അനിൽ കാരക്കാട്ട്, അഞ്ചൽ സോമൻ, സി.ആർ.സൂര്യനാഥ് എന്നിവർ വിവിധ കേന്ദ്രങ്ങളിൽ ഉദ്ഘാടനം ചെയ്തു. തിരഞ്ഞെടുക്കപ്പെട്ട 55 വിദ്യാർത്ഥികൾ 10ന് കൊല്ലത്ത് നടക്കുന്ന ജില്ലാതല മത്സരത്തിൽ പങ്കെടുക്കും.