കൊല്ലം: രാജ്യത്തെ പുതിയ ക്രിമിനൽ നിയമങ്ങൾ പഠിക്കാൻ അഭിഭാഷകർക്ക് കൊല്ലം ബാർ അസോസിയേഷൻ വേദിയൊരുക്കി. കേരള ജുഡീഷ്യൽ അക്കാഡമിയുമായി സഹകരിച്ചാണ് നിയമപഠന സെഷനുകൾ നടത്തുന്നത്. കേരള ജുഡീഷ്യൽ അക്കാഡമി ആദ്യമായിട്ടാണ് ഒരു ബാർ അസോസിയേഷനുമായി സഹകരിച്ച് എറണാകുളത്തിന് പുറത്ത് അഭിഭാഷകർക്കായി നിയമ പഠന പരിപാടി നടത്തുന്നത്. കൊല്ലം ആനന്ദവല്ലീശ്വരം ശ്രീ വിദ്യാധിരാജ എൻ.എസ്.എസ് ഓഡിറ്റോറിയത്തിൽ ആരംഭിച്ച നിയമ പഠനം ഹൈക്കോടതി ജഡ്ജ് ജസ്റ്റിസ് ദേവൻ രാമചന്ദ്രൻ ഓൺലൈനിലൂടെ ഉദ്ഘാടനം ചെയ്തു. എല്ലാ മേഖലയിലും എന്നത് പോലെ അഭിഭാഷക വൃത്തിയിലും നിലവാരം ഉയർത്തേണ്ടത് കാലഘട്ടത്തിന്റെ ആവശ്യമാണെന്ന് അദ്ദേഹം പറഞ്ഞു.

ബാർ അസോസിയേഷൻ പ്രസിഡന്റ് അഡ്വ. ഓച്ചിറ എൻ.അനിൽകുമാർ അദ്ധ്യക്ഷത വഹിച്ചു. കൊല്ലം ജില്ലാ സെഷൻസ് ജഡ്ജ് ജി. ഗോപകുമാർ മുഖ്യ പ്രഭാഷണം നടത്തി. കേരള ജുഡീഷ്യൽ അക്കാഡമി ഡയറക്ടർ കെ.എൻ. സുജിത്ത് അവതരണ പ്രഭാഷണം നടത്തി. ബാർ കൗൺസിൽ അംഗം അഡ്വ പി. സജീവ് ബാബു, കേരള ജുഡീഷ്യൽ അക്കാഡമി ജോയിന്റ് ഡയറക്ടർ ഡോ. ജോൺ വർഗീസ് എന്നിവർ സംസാരിച്ചു. കൊല്ലം ബാർ അസോസിയേഷൻ സെക്രട്ടറി അഡ്വ എ.കെ. മനോജ് സ്വാഗതവും അഡ്വ ജയൻ കൊട്ടിയം നന്ദിയും പറഞ്ഞു.