കുന്നത്തൂർ: നാടൻപാട്ട് കലാകാരൻ പി.എസ്.ബാനർജിയുടെ മൂന്നാമത് ചരമവാർഷിക ദിനാചരണത്തിന്റെ ഭാഗമായി പി.എസ്.ബാനർജി അക്കാഡമി ഒഫ് ഫോക് ലോർ ആൻഡ് ഫൈൻ ആർട്സിന്റെ നേതൃത്വത്തിൽ അനുസ്മരണ പരിപാടികൾക്ക് തുടക്കമായി. ശാസ്താംകോട്ട കെ.എസ്.എം ഡി.ബി കോളേജിൽ നടന്ന വരയോളം ചിത്ര പ്രദർശനത്തിൽ ബാനർജി വരച്ച നൂറോളം ചിത്രങ്ങളുടെ പ്രദർശനവും ചിത്രകാരന്മാർ പങ്കെടുത്ത ലൈവ് ചിത്രരചനയും നടന്നു. ചിത്ര പ്രദർശനത്തിന്റെ ഉദ്ഘാടനം കോളേജ് പ്രിൻസിപ്പൽ ഡോ.കെ.സി.പ്രകാശ് കെ.സി നിർവഹിച്ചു. തെറ്റിവരച്ച വരകൾ എന്ന വിഷയത്തെ അടിസ്ഥാനമാക്കി അർട്ട് സെമിനാർ നടന്നു. യുവ സാഹിത്യകാരൻ വിമൽ റോയി മോഡറേറ്ററായ സെമിനാർ കേരള കാർട്ടൂൺ അക്കാഡമി ജോ. സെക്രട്ടറി സജീവ് ശൂരനാട് ഉദ്ഘാടനം ചെയ്തു. ലളിതകലാ അക്കാഡമി പുരസ്കാര ജേതാവ് ആർ.ബി.ഷജിത്ത് പ്രബന്ധം അവതരിപ്പിച്ചു. പി.എസ്.ആസാദ്, പ്രസിഡന്റ് സഞ്ജയ് പണിക്കർ, സെക്രട്ടറി ജി.ബിജു, ജി.ശങ്കരൻകുട്ടി എന്നിവർ സംസാരിച്ചു.