കുന്നത്തൂർ: നാടൻ പാട്ടുകലാകാരനും ചിത്രകാരനും കാരിക്കേച്ചറിസ്റ്റുമായിരുന്ന പി.എസ്.ബാനർജിയുടെ മൂന്നാം ചരമവാർഷികാചരണത്തിന്റെ ഭാഗമായി സംസ്ഥാനതല ചിത്രരചനാ മത്സരം നടത്തി. എൽ.പി - യു.പി വിഭാഗം, എച്ച്.എസ്, എച്ച്.എസ്.എസ്, സീനിയർ വിഭാഗങ്ങളിലായി നടത്തിയ മൽസരത്തിൽ നൂറോളം പേർ പങ്കെടുത്തു. തുടർന്ന് നടന്ന ഫോക് ലോർ സെമിനാർ കവി ഇഞ്ചക്കാട് ബാലചന്ദ്രൻ ഉദ്ഘാടനം ചെയ്തു. ബൈജു മലനട മോഡറേറ്ററായി. മഹാത്മാഗാന്ധി സർവകലാശാല സ്കൂൾ ഒഫ് ലെറ്റേഴ്സിലെ പ്രൊഫ. അജുനാരായണൻ "ഫോക് ലോറിന്റെ സമകാലികത" എന്ന വിഷയത്തിൽ പ്രബന്ധമവതരിപ്പിച്ചു. ബാനർജി അക്കാഡമി ജോ. സെക്രട്ടറി മധുലാൽ നന്ദി പറഞ്ഞു. തുടർന്ന് കേരള സാംസ്കാരിക വകുപ്പ് ഫെലോഷിപ്പ് ലഭിച്ച കലാകാരന്മാരുടെ കലാപരിപാടികളും "പാട്ടോളം" ഗാനസന്ധ്യയും നടന്നു.