52 ലക്ഷത്തിന്റെ പദ്ധതി

45,000 രൂപ വാടക ഈടാക്കും

കൊട്ടാരക്കര: എം.സി റോഡിന്റെ അരികിലായി കുളക്കട ഗ്രാമപഞ്ചായത്ത് നിർമ്മിച്ച 'എറായം' വഴിയോര വിശ്രമകേന്ദ്രം ഈ മാസം 22ന് പ്രവർത്തനമാരംഭിക്കും. ടേക്ക് എ ബ്രേക്ക് പദ്ധതി പ്രകാരമാണ് 52 ലക്ഷം രൂപ ചെലവിൽ ഇവിടെ 'എറായം' എന്ന പേരിൽ വഴിയോര വിശ്രമകേന്ദ്രം നിർമ്മിച്ചത്. ദീർഘദൂര യാത്രക്കാർക്ക് വിശ്രമിക്കാനും ലഘു ഭക്ഷണത്തിനും വ്യായാമത്തിനുമടക്കമുള്ള സൗകര്യങ്ങളാണ് ഇവിടെ ഒരുക്കുന്നത്. രാത്രി തങ്ങാനടക്കമുള്ള മുറികളുമുണ്ട്. 2023 ജൂണിൽ മന്ത്രി കെ.എൻ.ബാലഗോപാൽ എറായം നാടിന് സമർപ്പിച്ചുവെങ്കിലും പ്രവർത്തനം തുടങ്ങാൻ വൈകി. കരാർ ഏറ്റെടുത്തയാൾക്കുണ്ടായ അസൗകര്യങ്ങളടക്കം തടസമായി. എല്ലാം പരിഹരിച്ചുകൊണ്ടാണ് ശേഷിച്ച അറ്റകുറ്റപ്പണികളും സൗന്ദര്യവത്കരണവും പൂർത്തിയാക്കി എറായം തുറക്കുന്നത്.

• കെ.എസ്.ടി.പി വിട്ടുനൽകിയ 25 സെന്റ് ഭൂമിയിലാണ് 'എറായം' .
• ഏറയം എന്ന പേരും വഴിയാത്രക്കാരെ ആകർഷിക്കും
• ദീർഘദൂര യാത്രക്കാർക്ക് ഗുണകരം
• കഫെറ്റീരിയ, വിശ്രമ മുറി, മുലയൂട്ടൽ മുറി, ടൊയ്ലറ്റുകൾ എന്നിവയുണ്ട്.
• വാടക മുറികളുമുണ്ട്. ഒരു ഭാഗത്തായി ഓപ്പൺ ജിംനേഷ്യവും സ്ഥാപിച്ചിട്ടുണ്ട്.
• ജില്ലാ പഞ്ചായത്ത് 11 ലക്ഷം രൂപ മുടക്കിയാണ് ജിംനേഷ്യം സ്ഥാപിച്ചത്.
• വ്യായാമത്തിന് ഉപകരിക്കുന്ന 10 ഉപകരണങ്ങൾ സജ്ജമാക്കി.

ഇനി സജീവമാകും

മാസം 45,000 രൂപ വാടക ഈടാക്കുംവിധമാണ് പഞ്ചായത്ത് കരാർ നൽകിയിട്ടുള്ളത്. കുളക്കട ഗ്രാമപഞ്ചായത്തിലെ താമസക്കാരന്റെ ചുമതലയിൽ പ്രവർത്തനം തുടങ്ങും. ഭക്ഷണമടക്കം സജ്ജമാക്കുന്നതിനാൽ ഇവിടം കൂടുതൽ സജീവമാകും.