കൊല്ലം: അറ്റകുറ്റപ്പണികൾക്കായി ഇന്നും നാളെയും കൂട്ടിക്കട ലെവൽക്രോസ് അടച്ചിടുന്നതോടെ ജംഗ്‌ഷനിൽ കൂട്ടക്കുഴപ്പത്തി​ന് സാദ്ധ്യത. സമീപത്തെ ഗേറ്റായ പുത്തൻ ചന്ത കഴി​ഞ്ഞ രണ്ടു ദി​വസം അടച്ചിട്ടപ്പോൾ കൂട്ടിക്കടയിൽ വലിയ പ്രതിസന്ധിയാണുണ്ടായത്.

ആർ.ഒ.ബി നിർമ്മാണത്തിനായി ഇരവിപുരം കാവൽപ്പുര ഗേറ്റ് മാസങ്ങളായി അടച്ചിട്ടതിൽ വീർപ്പുമുട്ടുകയാണ് നാല് മുക്കായ കൂട്ടിക്കട. കഴി​ഞ്ഞ വെള്ളിയാഴ്‌ച സ്‌കൂൾ ബസ് രണ്ട് മണിക്കൂർ ജംഗ്‌ഷനിൽ കുടുങ്ങി. നാല് ട്രെയി​നുകൾ കടന്നു പോകാൻ കുറഞ്ഞത് 25 മിനിറ്ര് ലെവൽക്രോസ് അടച്ചിടുമ്പോൾ നാല് ദിക്കി​ലും നിന്നായി നൂറോളം വാഹനങ്ങളാണ് കുടുങ്ങുന്നത്. രാവിലെയും വൈകിട്ടും നാല് ട്രെയിനുകൾ കടന്ന് പോയ ശേഷം ഗേറ്റ് തുറന്നാൽ മി​നുട്ടുകൾക്കകം വീണ്ടും നാല് വണ്ടികൾക്കായി ഗേറ്റ് പൂട്ടും. തുറക്കുമ്പോൾ കടന്ന് പോകാനുള്ള കൂട്ടപ്പൊരി​ച്ചി​ലുകൾ പലപ്പോഴും പ്രശ്‌നങ്ങൾക്ക് കാരണമാകുന്നു. വാഹനങ്ങൾ ഉരസുന്നതു മൂലമുള്ള തർക്കങ്ങൾ വേറെ. തദ്ദേശീയരുടെ ഇടപെടലുകൾ പലപ്പോഴും സംഘർഷത്തിനും കാരണമായിട്ടുണ്ട്.

സ്വകാര്യ മെഡി. ആശുപത്രി​യും മറ്റ് രണ്ട് ആശുപത്രികളുമുള്ള ഭാഗത്തേക്ക് എത്തുന്ന ആംബുലൻസുകളും പ്രതി​സന്ധി​യി​ലാവാറുണ്ട്.

കൂട്ടിക്കട ജംഗ‌്ഷനോട് ചേർന്ന സ്വകാര്യ ആശുപത്രിയിലേക്ക് റെയി​ൽവേ ഗേറ്റിന് അപ്പുറത്ത് നിന്ന് രോഗിയെ താങ്ങിയെടുത്ത് ഓട്ടോ ഡ്രൈവർമാരും ചുമട്ട് തൊഴിലാളികളും എത്തുന്നത് പതിവ് കാഴ്‌ചയാണ്. രാവിലെയും വൈകിട്ടും പോയിന്റ് ഡ്യൂട്ടിക്ക് പൊലീസി​നെയോ ട്രാഫിക് വാർഡനെയോ നിയമിക്കണമെന്നയാണ് പ്രദേശവാസി​കളുടെ ആവശ്യം. നേരത്തെ ഇക്കാര്യത്തിൽ പൊതുതാത്പര്യ ഹർജി സമർപ്പിച്ചതിനെ തുടർന്ന് ഹൈക്കോടതി ഇടപെടുകയും പോയിന്റ് ഡ്യൂട്ടിക്ക് പൊലീസി​നെ നി​യോഗി​ക്കുകയും ചെയ്തു. എന്നാൽ പി​ന്നീട് ഇത് ഇല്ലാതായി​. കൂട്ടിക്കടയിൽ റെയിൽവേ മേൽപ്പാലം നിർമ്മിക്കാനുള്ള തടസം നീങ്ങിയെങ്കിലും യാഥാർത്ഥ്യമാകാൻ വർഷങ്ങൾ കാത്തിരിക്കണം.