കൊല്ലം: ശ്രീനാരായണ ഗുരു ഓപ്പൺ​ യൂണി​വേഴ്സി​റ്റി​യുടെ ആസ്ഥാനത്തി​നായി​ മുണ്ടയ്ക്കൽ വി​ല്ലേജി​ൽ കണ്ടെത്തി​യ, പഴയ തോമസ് സ്റ്റീഫൻ കമ്പനി വക സ്ഥലം ഏറ്റെടുക്കാനുള്ള പദ്ധതി​ അട്ടി​മറി​ക്കാൻ നടക്കുന്ന നീക്കത്തി​ൽ പ്രതി​ഷേധി​ച്ച് എസ്.എൻ.ഡി.പി​ യോഗം കൊല്ലം യൂണിയൻ പ്രസിഡന്റ് മോഹൻശങ്കറും സെക്രട്ടറി എൻ. രാജേന്ദ്രനും.

ശ്രീനാരായണ പ്രസ്ഥാനങ്ങളുടെ നിരന്തരമായ ആവശ്യം പരിഗണിച്ചാണ് സർക്കാർ കൊല്ലത്ത് ശ്രീനാരായണ ഗുരു ഓപ്പൺ യൂണിവേഴ്സിറ്റി ആരംഭിച്ചത്. എന്നാൽ പ്രവർത്തനങ്ങളെ തകർക്കുന്ന സമീപനമാണ് പല ദിക്കുകളിൽ നിന്ന് ഉണ്ടായത്. യൂണിവേഴ്‌സിറ്റിക്ക് ആസ്ഥാനത്തി​നായി​ നിരവധി സ്ഥലങ്ങൾ പരിഗണിച്ച ശേഷമാണ് മുണ്ടയ്ക്കൽ വി​ല്ലേജി​ൽ സ്ഥലം കണ്ടെത്തി​യത്. വാങ്ങാൻ പണം ലഭ്യമാക്കുകയും ചെയ്‌തു. വില നിർണയിക്കാനുള്ള അധികാരം റവന്യു അധികൃതർക്കാണ്. എന്നാൽ ഈ സ്ഥലം മറ്റൊരാവശ്യത്തിനായി വർഷങ്ങൾക്ക് മുമ്പ് റവന്യു അധി​കൃതർ വില നിർണയിച്ചു നൽകിയിരുന്നു. അതിൽ നിന്ന് വളരെ കുറഞ്ഞ തുകയ്ക്കാണ് ഇപ്പോൾ മൂല്യനിർണയം നടത്തിയത്. അന്ന് ലേലത്തിൽ സ്ഥലം കൈവശമാക്കിയ ഉടമയ്ക്ക്, സർക്കാരിനു വേണ്ടി​ ഈ സ്ഥലം നൽകരുതെന്ന ലക്ഷ്യമുണ്ടോയെന്നും സംശയമുണ്ട്. ഒരു വ്യക്തി ഫ്ളാറ്റ്, വില്ല സമുച്ചയത്തിനായി​ സ്ഥലം നോട്ടമിട്ടിരുന്നതായി പ്രചരണമുണ്ട്. നഗരത്തി​ൽ യൂണി​വേഴ്സി​റ്റി​ക്ക് ഇത്രയും അനുയോജ്യമായ മറ്റൊരു സ്ഥലമില്ലെന്നിരിക്കെ അടിയന്തിരമായി സ്പെഷ്യൽ തഹസീൽദാരെ നിയമിച്ച് സ്ഥലമെടുക്കൽ നടപടി ത്വരിതപ്പെടുത്തണം. ശ്രീനാരായണ ദർശനങ്ങളെയും വിദ്യാഭ്യാസ രംഗത്തെയും തകർക്കാനും ശ്രീനാരായണീയർ ഏറെയുളള മുണ്ടയ്ക്കൽ പ്രദേശത്തിന്റെ വികസന പ്രവർത്തനങ്ങളെ അട്ടിമറിക്കാനുമുള്ള ബോധപൂർവ്വമായ ശ്രമം കൂടിയാണ് ഇതെന്നും ഇരുവരും പ്രസ്താവനയി​ൽ പറഞ്ഞു.