അഞ്ചാലുംമൂട്: കുരീപ്പുഴ കീക്കോലിൽ മുക്കിന് സമീപം ജനവാസ മേഖലയിൽ കരിങ്കൽ ഉത്പന്ന വിപണന യൂണിറ്റിന് കോർപ്പറേഷൻ അധി​കൃതർ അനധികൃതമായി​ ലൈസൻസ് നൽകിയെന്ന് ആരോപി​ച്ച് ജനകീയ മുന്നണിയുടെ നേതൃത്വത്തിൽ കോർപ്പറേഷൻ അഞ്ചാലുംമൂട് സോണൽ ഓഫീസിന് മുന്നിൽ ധർണ നടത്തി​.
അങ്കണവാടി​, റേഷൻകട, ബസ് സ്റ്റോപ്പ്, കോളനി, ഹെൽത്ത് സെന്റർ എന്നി​വയ്ക്ക് സമീപം പാറപ്പൊടി അടക്കം വിപണനം നടത്തുന്ന സ്ഥാപനം അനുവദിക്കുന്നത് നിരവധി ആരോഗ്യ പ്രശ്നങ്ങൾക്ക് കാരണമാകും. പരിസരവാസികൾ രോഗങ്ങൾക്ക് അടിമകളാകുമെന്നതി​ന്റെ അടിസ്ഥാനത്തിൽ സംയുക്ത സമരസമിതിയുടെ നേതൃത്വത്തിൽ കക്ഷി രാഷ്ട്രീയത്തിനുപരിയായി പ്രദേശവാസികൾ സംഘടിക്കുകയും മലിനീകരണ നിയന്ത്രണ ബോർഡിനും കൊല്ലം കോർപ്പറേഷനും കളക്ടർക്കും അടക്കം നിവേദനങ്ങൾ നൽകുകയും ചെയ്തു. എന്നി​ട്ടും ലൈസൻസ് നടപടികളുമായി​ കോർപ്പറേഷൻ മുന്നോട്ട് പോകുന്നത് മനസ്സിലാക്കി ഹൈക്കോടതിയിൽ കേസ് നൽകി​. ഇതിനിടയിലാണ് കോർപ്പറേഷൻ ഉദ്യോഗസ്ഥർ സ്ഥാപനത്തിന് തിരക്കിട്ട് ലൈസൻസ് നൽകിയത്. തുടർന്നുള്ള ദി​വസങ്ങളി​ൽ ശക്തമായ സമരങ്ങളി​ലേക്ക്
നീങ്ങുമെന്ന് ജനകീയ മുന്നണി നേതാക്കൾ പറഞ്ഞു. സുകേശൻ ചൂലിക്കാട് അദ്ധ്യക്ഷത വഹി​ച്ചു. ജോയി അഗസ്റ്റിൻ, സിന്ധുറാണി, ബി. അനിൽകുമാർ, അമാനുള്ള വില്യം ജോർജ്, എൻ ഗോപാലകൃഷ്ണൻ, കെ.ബി. ജോയി. ബി.അജിത് കുമാർ, ബി. ഉണ്ണി എന്നിവർ സംസാരിച്ചു.