പടിഞ്ഞാറെകല്ലട: കല്ലടയാറ്റിലെ ജങ്കാർ സർവീസ് നിലച്ചിട്ട് മാസങ്ങളായി. കല്ലടയാറ്റിൽ പടിഞ്ഞാറെ കല്ലട, മൺട്രോത്തുരുത്ത് ഗ്രാമ പഞ്ചായത്തുകളെ തമ്മിൽബന്ധിപ്പിച്ചുകൊണ്ടുള്ള ജങ്കാർ സർവീസ് ആയതിനാൽ രണ്ട് കരകളിലേയും ആളുകൾ യാത്രാദുരിതം അനുഭവിക്കുകയാണിപ്പോൾ.

അഷ്ടമുടിക്കായലിൽ പെരുമൺ പേഴും തുരുത്ത് കടവുകളെയും കല്ലടയാറ്റിൽ മൺട്രോതുരുത്ത് പടി.കല്ലട പഞ്ചായത്തുകളെയും തമ്മിൽ ബന്ധിപ്പിച്ചുകൊണ്ടുള്ള പനയം ഗ്രാമപഞ്ചായത്തിന്റെ ഉത്തരവാദിത്വത്തിൽ കഴിഞ്ഞദിവസം മുതൽ പെരു മണിൽ ജങ്കാർ സർവീസ് പുനരാരംഭിച്ചു. കല്ലടയാറ്റിൽ കണ്ണങ്കാട്ട് റെയിൽവേ പാലത്തിന് സമീപം ഉണ്ടായിരുന്ന ജങ്കാർ സുരക്ഷാ കാരണങ്ങളാൽ ആണ് നിറുത്തിവെച്ചത്. ജങ്കാർ സർവീസ് എത്രയും വേഗംപുനരാരംഭിക്കുവാൻ പടിഞ്ഞാറെ കല്ലട, മൺട്രോത്തുരുത്ത് ഗ്രാമപഞ്ചായത്ത് അധികൃതർ സത്വര നടപടി സ്വീകരിക്കണമെന്നാണ് നാട്ടുകാരുടെ ആവശ്യം.

• ജങ്കാർ സർവീസ് നിലച്ചതോടെ കൊല്ലത്ത് പോകാൻ പത്ത് കിലോമീറ്ററിലധികം സഞ്ചരിക്കണം
• നിലവിൽ കണ്ണങ്കാട്ട് കടവിൽ നിന്ന് കൊല്ലത്തേക്ക് ചവറ വഴിയും കുണ്ടറ വഴിയും 27 കിലോമീറ്റർ യാത്ര ചെയ്യണം.
• യാത്രക്കാർക്ക് വൻ സാമ്പത്തിക നഷ്ടവും സമയ നഷ്ടവും വരുത്തുന്നു.

• പെരുമൺ പാലം അന്തിമഘട്ടത്തിൽ
• അഷ്ടമുടി കായലിൽ കുറുകെ നിർമ്മിക്കുന്ന പെരുമൺ പാലത്തിന്റെ നിർമ്മാണം അന്തിമഘട്ടത്തിലാണ്.
• കണ്ണങ്കാട്ട് കടവ് പാലത്തിന്റെ നിർമ്മാണം 2025 ജനുവരിയോടെ തുടങ്ങാനാണ് സാദ്ധ്യത .
• സമാന്തര റോഡിനായുള്ള ഭൂമിയേറ്റെടുക്കൽ നടപടികൾ അന്തിമ ഘട്ടത്തിലാണ്. അതുകൂടി കഴിഞ്ഞാൽ ടെണ്ടർ നടപടികൾ തുടങ്ങും.
• കിഫ്ബിയ്ക്കാണ് നിർമ്മാണ ചുമതല.
• 2017 ലാണ്പാലം നിർമ്മാണത്തിന് സർക്കാരിൽ നിന്ന് ഭരണാനുമതി ലഭിച്ചത്.