ഓച്ചിറ: ഓച്ചിറ പരബ്രഹ്മക്ഷേത്രത്തിൽ 37 വധൂവരന്മാരുടെ സമൂഹവിവാഹം നടന്നു. ഒരു ഗ്രാം സ്വർണതാലിയും പാരിതോഷികമായി 2 ലക്ഷം രൂപയും വധൂവരന്മാർക്കുള്ള വിവാഹവസ്ത്രവും ക്ഷേത്രഭരണസമിതി നൽകി. രാവിലെ 10ന് ആരംഭിച്ച വിവാഹ ചടങ്ങ് തെലുങ്കാന ഉപമുഖ്യമന്ത്രി മല്ലു ഭട്ടി വിക്രമർക്ക ഉദ്ഘാടനം ചെയ്തു. ക്ഷേത്രഭരണസമിതി പ്രസിഡന്റ് ജി.സത്യൻ അദ്ധ്യക്ഷനായി. സെക്രട്ടറി കെ.ഗോപിനാഥൻ സ്വാഗതം പറഞ്ഞു. മന്ത്രിമാരായ കെ.എൻ.ബാലഗോപാൽ താലിയും ചിഞ്ചുറാണി വധുവരന്മാർക്കുള്ള പാരിതോഷികവും യു.പ്രതിഭ എം.എൽ.എ വരണമാല്യവും കൈമാറി. മുൻ പ്രതിപക്ഷനേതാവ് രമേശ് ചെന്നിത്തല മുഖ്യ പ്രസംഗം നടത്തി. കൈതപ്രം ദാമാദരൻ നമ്പൂതിരി വിശിഷാതിഥിയായിരുന്നു. രക്ഷാധികാരി അഡ്വ.എം.സി.അനിൽകുമാർ, എം.എൽ.എമാരായ സി.ആർ. മഹേഷ്, യു.പ്രതിഭ, സുജിത് വിജയൻപിള്ള, ഗ്രാമപഞ്ചായത്തംഗം എ.അജ്മൽ തുടങ്ങിയവർ അനുഗ്രഹപ്രഭാഷണം നടത്തി. ട്രഷറർ പ്രകാശൻ വലിയഴീക്കൽ നന്ദി പറഞ്ഞു..

ഭരണസമിതിയുടെ നേതൃത്വത്തിൽ നടന്ന മൂന്നാമത് സമൂഹ വിവാഹമാണിത്.