കൊല്ലം: ഹിന്ദു സേന ചാരിറ്റബിൾ സൊസൈറ്റിയുടെ നേതൃത്വത്തിൽ മഹാഗണേശോത്സവം സെപ്തംബർ 5 മുതൽ 7 വരെ ജില്ലയിൽ വിപുലമായി ആഘോഷിക്കും. 5ന് ആര്യങ്കാവ് ശ്രീ.ധർമ്മ ശാസ്താ ക്ഷേത്രത്തിൽ നിന്നാരംഭിക്കുന്ന ഗണേശോത്സവ രഥയാത്ര പ്രയാണ ഘോഷയാത്രയിൽ വിനായക മിഴിതുറക്കൽ കർമ്മം രാവിലെ 6ന് മധുര സൗത്ത് മുൻ എം.എൽ.എ എസ്.എസ്.ശരവണൻ നിർവ്വഹിക്കും. ക്ഷേത്രോപദേശക സമിതി പ്രസിഡന്റ് എൻ. രാധാകൃഷ്ണൻ, സെക്രട്ടറി അയ്യപ്പൻകുട്ടി എന്നിവർ പങ്കെടുക്കും. വൈകിട്ട് 6ന് കുണ്ടറ ഇളമ്പള്ളൂർ ദേവീക്ഷേത്രത്തിൽ എത്തിച്ചേരുന്ന രഥയാത്രയെ പി.സി.വിഷ്ണുനാഥ് എം.എൽ.എ സ്വീകരിക്കും. 6ന് രാവിലെ ക്ഷേത്രത്തിൽ നിന്നാരംഭിക്കുന്ന ഘോഷയാത്ര വിവിധ ക്ഷേത്രങ്ങളിലെ സ്വീകരണം ഏറ്റുവാങ്ങി കൊല്ലം മുളങ്കാടകം ദേവീക്ഷേത്രസന്നിധിയിൽ എത്തിച്ചേർന്ന് വിഗ്രഹപ്രതിഷ്ഠ നടത്തും. വൈകിട്ട് 6ന് ഗണേശോത്സവം എൻ.കെ.പ്രേമചന്ദ്രൻ എം.പി ഭദ്രദീപം കൊളുത്തി ഉദ്ഘാടനം ചെയ്യും. ഡോ.സുജിത്ത് വിജയൻപിള്ള എം.എൽ.എ, അഡ്വ. ബിന്ദുകൃഷ്ണ, യജ്ഞാചാര്യൻ മാത്രാ സുന്ദരേശൻ സനാതനം, അഡ്വ.എം.എസ്. ഗോപകുമാർ, അഡ്വ.തേവള്ളി ആർ സന്തോഷ്‌കുമാർ, ഡോ. ആർ. ദിജുകൃഷ്ണൻ, എസ്. നാരായണ സ്വാമി എന്നിവർ പങ്കെടുത്തു. 7ന് രാവിലെ ഗണേശ പുരാണ സ്ത്സംഗം, ഗണേശ പുരാണ പരായണം, നാമസങ്കീർത്തനം, ഗണേശ കഥാപ്രവചനം, നിവേദ്യവിതരണം എന്നിവ നടക്കും. വൈകിട്ട് 4 ന് ഗണേശ വിഗ്രഹ നിമജ്ജനം തിരുമുല്ലാവാരത്ത് നടക്കും.