തൃശൂർ: കാർബൺ ഇല്ലാത്ത മണ്ണും വായുവും ലക്ഷ്യമിട്ട് തദ്ദേശ സ്വയംഭരണ സ്ഥാപനങ്ങളുടെ പങ്കാളിത്തത്തോടെ നടപ്പാക്കിയ 'നെറ്റ് സീറോ കാർബൺ കേരളം ജനങ്ങളിലൂടെ' ജില്ലയിലെ അഞ്ച് പഞ്ചായത്തുകളിലും ഫലം കാണാൻ തുടങ്ങിയതോടെ പദ്ധതിയിൽ ഉൾപ്പെടാൻ ഒരുങ്ങി കൂടുതൽ തദ്ദേശസ്ഥാപനങ്ങളും.
ഒന്നരവർഷമായി തുടങ്ങിയ പദ്ധതി വഴി കാർബൺ പുറന്തള്ളൽ, കാർബൺ ഫുട്പ്രിന്റ് എന്നിവയുടെ അളവ് കണ്ടെത്താനുള്ള ശ്രമമാണ് നടക്കുന്നത്. അത് പൂർത്തിയാകുന്നതോടെ പഞ്ചായത്തുകളെ ഇനിയും പദ്ധതിയിൽ ഉൾപ്പെടുത്താനാകും. ഊർജ്ജ സംരക്ഷണം ലക്ഷ്യമിട്ട് അനർട്ട് പി.എം.കുസും പദ്ധതിയിൽ ഉൾപ്പെടുത്തി കാർഷിക വൈദ്യുത കണക്ഷനുള്ള കർഷകർക്ക് കാർഷിക മോട്ടോർ പമ്പുകളിൽ സോളാർ പാനൽ സ്ഥാപിക്കുന്ന പദ്ധതിയാണ് 'നെറ്റ് സീറോ കാർബൺ ' പദ്ധതി വഴി ഇനി നടത്തുന്നത്. കാർഷികസമൃദ്ധി ഉറപ്പാക്കാനായി പച്ചക്കറിക്കൃഷിയും ഉറപ്പാക്കിയിരുന്നു. ഇതെല്ലാം ജനങ്ങളിൽ സ്വീകാര്യത ഉണ്ടാക്കിയതോടെയാണ് തദ്ദേശസ്ഥാപനങ്ങൾ പദ്ധതിയിലേക്ക് ആകൃഷ്ടരായത്.
നടപ്പാക്കിയത്
തരിശുരഹിത പഞ്ചായത്താക്കി കാർഷിക അഭിവൃദ്ധി
മാലിന്യസംസ്‌കരണം ശാസ്ത്രീയമായി നടപ്പാക്കി ശുചിത്വവത്കരണം
ഉപയോഗശൂന്യമായ തോടും കുളങ്ങളും നവീകരിക്കൽ
വിദ്യാലയങ്ങളിൽ സോളാർ ഉപയോഗത്തെക്കുറിച്ച് ബോധവത്കരണം.
അംഗൻവാടികളിൽ സോളാർ ഉപകരണങ്ങൾ സ്ഥാപിച്ച് ഊർജ്ജസംരക്ഷണം
ലക്ഷ്യത്തിലെത്താൻ കാലതാമസം
കാർബൺഡൈ ഓക്‌സൈഡ്, മീഥെയിൻ തുടങ്ങിയ ഹരിതഗൃഹവാതകങ്ങളുടെ പുറന്തള്ളൽ അന്തരീക്ഷത്തിന് താങ്ങാൻ കഴിയുന്ന രീതിയിലേക്ക് പരിമിതിപ്പെടുത്തുകയാണ് ലക്ഷ്യം. വർഷങ്ങൾ നീണ്ട പ്രക്രിയയാണിത്. നിശ്ചിതപ്രദേശത്ത് എത്രത്തോളം ഹരിതഗൃഹ വാതകങ്ങളുണ്ട് എന്ന് കണക്കാക്കുകയാണ് പ്രാഥമികമായി ചെയ്തത്. മാലിന്യസംസ്‌കരണം, കൃഷി, ജലസംരക്ഷണം, വൃക്ഷവത്കരണം, ഊർജസംരക്ഷണം, ഗതാഗതം തുടങ്ങിയ മേഖലകളിലെ ഇടപെടലിലൂടെയാണ് പദ്ധതി സാദ്ധ്യമാക്കുന്നത്. വിവിധ വകുപ്പുകളുടെ സഹായത്തോടെയാണ് ഫണ്ട് വിനിയോഗം സാദ്ധ്യമാകുന്നത്.
ആദ്യഘട്ടത്തിൽ തെരഞ്ഞെടുത്തത്
വരന്തരപ്പിള്ളി
വല്ലച്ചിറ
മാടക്കത്തറ
കുഴൂർ
കൊണ്ടാഴി
ആദ്യഘട്ടത്തിൽ പദ്ധതി വിജയകരമായി അഞ്ച് പഞ്ചായത്തിലും നടപ്പാക്കാനായി. ദീർഘകാലം കൊണ്ടു മാത്രമേ ലക്ഷ്യം പൂർത്തിയാക്കാൻ കഴിയൂ.
സി.ദിദിക
ജില്ല കോ ഓർഡിനേറ്റർ, ഹരിതകേരളം മിഷൻ
വഴികൾ പലത്
വ്യവസായം, ഊർജ്ജം, കൃഷി, മാലിന്യം തുടങ്ങിയ മേഖലയിൽ നിന്നുള്ള വിവരശേഖരണമാണ് മുഖ്യം. വാഹനങ്ങളുടെ എണ്ണം, ഇന്ധന ഉപയോഗം, വൈദ്യുതി ബില്ല് തുടങ്ങിയ നിരവധി വിവരങ്ങൾ ശേഖരിക്കുന്നുണ്ട്. മരങ്ങളുടെ വണ്ണവും ഉയരവും കണക്കാക്കി കാർബൺ സംഭരണം കണ്ടെത്തുകയും മണ്ണിലുള്ളത് പരിശോധിക്കുകയും ചെയ്യുന്നുണ്ട്.
എന്താണ് നെറ്റ് സീറോ?
ഹരിതഗൃഹ വാതകങ്ങളായ കാർബൺ ഡൈ ഓക്‌സൈഡ്, മീഥെയിൻ, നൈട്രസ് ഓക്‌സൈഡ് എന്നിവയുടെ അമിതമായ പുറന്തള്ളലാണ് ആഗോളതാപനം വർദ്ധിക്കുന്നതിന്റെ പ്രധാന കാരണങ്ങളിലൊന്ന്. ഇതിൽ ഏറ്റവും അപകടകാരി കാർബൺ ഡൈ ഓക്‌സൈഡാണ്. ആഗോള താപനം കുറയ്ക്കാനായി നെറ്റ് സീറോ എന്ന ആശയം വർഷങ്ങൾ മുമ്പ് അംഗീകരിക്കപ്പെട്ടതാണ്.