വെള്ളാങ്ങല്ലൂർ: വെള്ളാങ്ങല്ലൂർ പഞ്ചായത്ത് പ്രസിഡന്റായി സി.പി.ഐയിലെ നിഷ ഷാജി തിരഞ്ഞെടുക്കപ്പെട്ടു. ഇടതുമുന്നണി ധാരണ പ്രകാരം സി.പി.എമ്മിലെ എം.എം.മുകേഷ് രാജി വെച്ചതിനെ തുടർന്നാണ് തിരഞ്ഞെടുപ്പ് നടന്നത്. തിരഞ്ഞെടുപ്പിൽ എൽ.ഡി.എഫിൽ നിന്ന് നിഷ ഷാജിയും യു.ഡി.എഫിൽ നിന്ന് ഷംസു വെളുത്തേരിയും തമ്മിലാണ് മത്സരം നടന്നത്.

നിഷ ഷാജിക്ക് 13 വോട്ടും ഷംസു വെളുത്തേരിക്ക് 8 വോട്ടും ലഭിച്ചു. നിലവിൽ 21 അംഗ കമ്മിറ്റിയിൽ എൽ.ഡി.എഫിന് 13 ഉം യു.ഡി.എഫിന് 8 ഉം അംഗങ്ങളാണുള്ളത്. 2010 മുതൽ തുടർച്ചയായി പഞ്ചായത്ത് അംഗമായി തുടരുന്ന നിഷ ഷാജി ആറാം വാർഡിൽ നിന്ന് ഒരു തവണയും എട്ടാം വാർഡിൽ നിന്ന് രണ്ട് തവണയും ജയിച്ചു. കഴിഞ്ഞ തിരഞ്ഞെടുപ്പിൽ ജനറൽ സീറ്റിൽ നിന്നാണ് ജയിച്ചത്. വികസനകാര്യ സ്ഥിരം സമിതി അദ്ധ്യക്ഷയായും പ്രവർത്തിച്ചു. നിലവിൽ സി.പി.ഐ വെള്ളാങ്ങല്ലൂർ ലോക്കൽ കമ്മിറ്റി അംഗവും കേരള മഹിളാസംഘം വെള്ളാങ്ങല്ലൂർ പഞ്ചായത്ത് സെക്രട്ടറിയുമാണ്.