പുതുക്കാട്: വിവിധ സർക്കാർ ഓഫീസുകളെ ഒരു കുടക്കീഴിലാക്കുന്ന സ്വപ്ന പദ്ധതിയായ പുതുക്കാട് മിനി സിവിൽ സ്‌റ്റേഷൻ നിർമ്മാണത്തിന് സാങ്കേതികാനുമതി. 2022-23 സാമ്പത്തിക വർഷത്തെ സംസ്ഥാന ബഡ്ജറ്റിൽ കെ.കെ.രാമചന്ദ്രൻ എം.എൽ.എ യുടെ ആവശ്യപ്രകാരം 10 കോടി രൂപ ഇതിനായി നീക്കിവച്ചിരുന്നു. ഭൂമി തരം മാറ്റൽ, സിവിൽ സ്‌റ്റേഷനിലേക്കുള്ള റോഡിനായി സൗജന്യമായി ഭൂമി ലഭ്യമാക്കൽ, മണ്ണ് പരിശോധന ഉൾപ്പടെയുള്ള നടപടികൾ പൂർത്തിയാക്കി കഴിഞ്ഞ വർഷം മാർച്ച് 30ന്
ഭരണാനുമതി ലഭ്യമാക്കിയിരുന്നു. 3 നിലകളിലായി 29,535 സ്‌ക്വയർ് ഫീറ്റ് വിസ്തൃതിയിലാണ് മിനി സിവിൽ സ്‌റ്റേഷൻ കെട്ടിട സമൂച്ചയം നിർമ്മിക്കുന്നത്. സബ് ട്രഷറി ഓഫീസ്, വില്ലേജ് ഓഫീസ്, എം.എൽ.എ. ഓഫീസ്, മിനി കോൺഫറൻസ് ഹാൾ, ഇറിഗേഷൻ ഓഫീസ്, ടോയ്‌ലറ്റുകൾ എന്നിവ ഒന്നാം ഘട്ടത്തിൽ ഉൾപ്പെടുത്തിയിട്ടുണ്ട്. ഗ്രൗണ്ട് ഫ്‌ലോറിൽ 25 വാഹനങ്ങൾക്കും, യാർഡിൽ 30 വാഹനങ്ങൾക്കുമുള്ള വിശാലമായ കാർ പാർക്കിംഗ് സൗകര്യവും ഒരുക്കും. ലിഫ്റ്റ്‌സൗകര്യങ്ങളും കെട്ടിട സമുച്ചയത്തിൽ വിഭാവനം ചെയ്തിട്ടുണ്ട്.

10 കോടി രൂപയുടെ സാങ്കേതിക അനുമതിയാണ് പൊതുമരാമത്ത് വകുപ്പ് കെട്ടിട വിഭാഗം ചീഫ് എൻജിനീയർ നൽകിയിട്ടുള്ളത്. ടെൻഡർ നടപടികൾ പൂർത്തീകരിച്ച് എത്രയും വേഗം നിർമ്മാണം ആരംഭിക്കുന്നതിനാണ് ശ്രമിക്കുന്നത്.
കെ.കെ. രാമചന്ദ്രൻ എം.എൽ.എ.