തൃശൂർ: മാർഗതടസം സൃഷ്ടിച്ചുവെന്നാരോപിച്ചു കേന്ദ്രമന്ത്രി സുരേഷ് ഗോപി മാദ്ധ്യമ പ്രവർത്തകർക്കെതിരെ സിറ്റി പൊലീസ് കമ്മിഷണർക്ക് പരാതി നൽകി. രാമനിലയം ഗസ്റ്റ് ഹൗസിൽ മാദ്ധ്യമപ്രവർത്തകർ മാർഗ തടസം സൃഷ്ടിച്ചെന്നാണ് പരാതി . സുരക്ഷാ ഉദ്യോഗസ്ഥന്റെ ഔദ്യോഗിക കൃത്യനിർവഹണം തടസപ്പെടുത്തിയെന്നും ആരോപിക്കുന്നു.

പരാതിയുടെ അടിസ്ഥാനത്തിൽ സിറ്റി പൊലീസ് പ്രാഥമിക അന്വേഷണം തുടങ്ങിയിട്ടുണ്ട്. മാദ്ധ്യമപ്രവർത്തകർക്കെതിരെ കേസെടുത്തേക്കുമെന്നും സൂചനയുണ്ട്. രാമനിലയം ഗസ്റ്റ് ഹൗസിലെ സി.സി ടിവി ദൃശ്യങ്ങളും പരിശോധിച്ചിരുന്നു.

ഇതിനിടെ മുൻ എം.എൽ.എ അനിൽ അക്കര നൽകിയ പരാതിയിൽ അന്വേഷണം തുടങ്ങി. അക്കരയുടെ മൊഴി ഇന്ന് രാവിലെ 11ന് തൃശൂർ പൊലീസ് രേഖപ്പെടുത്തും.