വർക്കല: ചെമ്മരുതി ഗ്രാമപഞ്ചായത്തിലെ ആറ് പതിറ്റാണ്ടിലധികം പഴക്കമുള്ള പനയറ മൂഴിയിൽ നടപ്പാലം തകർന്ന നിലയിൽ. 1959 കാലഘട്ടത്തിൽ നിർമ്മിച്ച ഈ പാലം ചാവടിമുക്ക്, വണ്ടിപ്പുര, കോവൂർ എന്നിവിടങ്ങളിലുള്ളവരുടെ പ്രധാന സഞ്ചാര പാതയായിരുന്നു. കാർഷികമേഖല കൂടിയായ ചെമ്മരുതിയിൽ തച്ചോട്, ചാവടിമുക്ക് ചന്തകളിലേക്ക് കാർഷിക ഉത്പന്നങ്ങൾ നേരിട്ട് എത്തിക്കുന്നതിന് ഈ പാലം സഹായകമായിരുന്നു. പാലത്തിന് ബലക്ഷയം സംഭവിക്കുകയും ജന സഞ്ചാരം കുറയുകയും ചെയ്തു.

 ഇവിടം സാമൂഹികവിരുദ്ധരുടെയും താവളമായി.

 പാലം അപകടവസ്ഥയിലായതോടെ പാടം ചുറ്റിയാണ് വിദ്യാർത്ഥികൾ സ്കൂളിലെത്തുന്നത്.

മഴയിൽ വയൽ വരമ്പുകൾ ഇടിഞ്ഞതോടെ ഇതുവഴിയുള്ള യാത്രയും ദുഷ്കരമാണ്.

 പാലം നവീകരിക്കണമെന്നും കാടുപിടിച്ചു കിടക്കുന്ന ഇവിടം നന്നാക്കി റോഡ് സഞ്ചാരയോഗ്യമാക്കണമെന്നും കയ്യേറിയ റോഡിന്റെ ഭാഗം വീണ്ടെടുത്ത് പുനർനിർമ്മാണത്തിനുള്ള നടപടികൾ അധികൃതർ സ്വീകരിക്കണമെന്നും നാട്ടുകാർ ആവശ്യപ്പെടുന്നു.