കറുകച്ചാൽ : മുൻ വൈരാഗ്യത്തിന്റെ പേരിൽ യുവാവിനെയും ഭാര്യയെയും വീടുകയറി ആക്രമിച്ച നാല് പേരെ പൊലീസ് അറസ്റ്റ് ചെയ്തു. കുന്നന്താനം പാലക്കതകിടി കാഞ്ഞിരത്താനം ഗോകുൽ പ്രസാദ് (28), പുള്ളോലിക്കൽ സുജിത്ത് പി.ആർ (29), പുള്ളോലിക്കൽ വിഷ്ണു വിജയൻ (28), സന്ദീപ് ഭവനത്തിൽ സന്ദീപ് മോഹനൻ (29) എന്നിവരാണ് അറസ്റ്റിലായത്. ഇവർ കഴിഞ്ഞ ദിവസം രാത്രി 10ന് കറുകച്ചാൽ തെങ്ങോലിപ്പടി ഭാഗത്തുള്ള യുവാവിന്റെ വീട്ടിൽ അതിക്രമിച്ച് കയറി കതക് തള്ളി തുറന്ന് യുവാവിനെയും ഭാര്യയെയും ചീത്ത വിളിക്കുകയും കതകിന്റെ പാളി ഉപയോഗിച്ച് ഇവരെ ഇടിപ്പിക്കുകയുമായിരുന്നു. വഴി തർക്കത്തിന്റെ പേരിൽ യുവാവിനോട് ഇവർക്ക് മുൻ വിരോധം നിലനിന്നിരുന്നു ഇതിന്റെ തുടർച്ചയെന്നോണമായിരുന്നു ആക്രമണം. പരാതിയെ തുടർന്ന് കറുകച്ചാൽ പൊലീസ് കേസ് രജിസ്റ്റർ ചെയ്യുകയും, തുടർന്ന് നടത്തിയ തിരച്ചിലിൽ ഇവരെ പിടികൂടുകയുമായിരുന്നു. സ്റ്റേഷൻ എസ്.എച്ച്.ഒ പ്രശോഭ്, എസ്.ഐ മാരായ ജയകുമാർ, സജുലാൽ , സി.പി.ഒമാരായ രതീഷ്, ജോഷി സേവിയർ, ശിവപ്രസാദ്, വിവേക്, ഡെന്നി ചെറിയാൻ , സുരേഷ് എന്നിവർ ചേർന്നാണ് ഇവരെ അറസ്റ്റ് ചെയ്തത്.