തിരുവനന്തപുരം: വയനാട് ദുരന്തഭൂമിയിൽ പത്തുദിവസം നീണ്ട രക്ഷാദൗത്യം പൂർത്തിയാക്കി മടങ്ങിയെത്തിയ സൈനികരെ സ്വാതന്ത്ര്യദിനാഘോഷങ്ങളുടെ ഭാഗമായി ലുലുമാളിൽ ആദരിച്ചു. ലുലുമാളും പാങ്ങോട് സൈനിക കേന്ദ്രവും ചേർന്ന് സംഘടിപ്പിച്ച ലുലു ഫ്രീഡം ഫിയസ്റ്റയുടെ സമാപന ചടങ്ങിലായിരുന്നു ആദരം.

ചടങ്ങിൽ പാങ്ങോട് സൈനിക കേന്ദ്രത്തിൽ നിന്ന് വയനാട് ദൗത്യത്തിൽ പങ്കെടുത്ത കേണൽ രോഹിത് ജതെയ്ൻ, ലെഫ്.കേണൽ ഋഷി രാജലക്ഷ്മി, ക്യാപ്റ്റൻ സൗരഭ് സിംഗ്, മേജർ വിപിൻ മാത്യു, സുബേദാർ കെ. പത്മകുമാർ, നായിക് ഷഫീഖ് എസ്.എം, ഹവിൽദാർ മായാന്ദി. എ, ലാൻസ് നായിക് പുരുഷോത്തം.കെ, നായിക് ഡ്രൈവർ ആൻഡ് ഓപ്പറേറ്റർ വിജു. വി എന്നിവരെ സ്റ്റേഷൻ കമാൻഡർ ബ്രിഗേഡിയർ സലിൽ എം.പിയുടെ നേതൃത്വത്തിൽ ആദരിച്ചു. ഷിരൂരിലടക്കം രക്ഷാപ്രവർത്തനങ്ങളിൽ പങ്കെടുത്ത രഞ്ജിത് ഇസ്രായേലിനേയും ആദരിച്ചു.

തുടർന്ന് ആർമി പബ്ലിക് സ്‌കൂളിലെ വിദ്യാർത്ഥികൾ അവതരിപ്പിച്ച വിവിധ കലാപരിപാടികളും നടന്നു. ലുലു ഫ്രീഡം ഫിയസ്റ്റയുടെ ഭാഗമായി പാങ്ങോട് സൈനിക കേന്ദ്രത്തിന്റെ നേതൃത്വത്തിൽ ആയുധങ്ങളുടെ പ്രദർശനവും സംഘടിപ്പിച്ചിരുന്നു.