തിരുവനന്തപുരം: ശ്രീനാരായണഗുരുദേവ ജയന്തി മുതൽ അയ്യങ്കാളി ജയന്തി വരെ നടക്കുന്ന നവോത്ഥാനവാരത്തിന് ജവഹർ ബാലഭവനിൽ തുടക്കമായി. നമുക്ക് ജാതിയില്ല വിളംബര ശതാബ്ദി സ്‌മാരക ശ്രീനാരായണഗുരു പ്രതിമയിൽ കടകംപള്ളി സുരേന്ദ്രൻ എം.എൽ.എ, ബാലഭവൻ ചെയർമാൻ കൂടിയായ വി.കെ.പ്രശാന്ത് എം.എൽ.എ എന്നിവർക്കൊപ്പം വിദ്യാർത്ഥികൾ പുഷ്പാർച്ചന നടത്തി. തുടർന്ന് 'നവോത്ഥാന കേരളം' എന്ന വിഷയത്തിൽ കുട്ടികൾക്കായുള്ള പ്രസംഗ മത്സരം നടന്നു. ബാലഭവൻ പ്രിൻസിപ്പൽ ഇൻചാർജ് വി.കെ.നിർമ്മല കുമാരി, എക്‌സിക്യുട്ടീവ് ഓഫീസർ ഒ.കെ. രാജൻ, ജീവനക്കാർ, രക്ഷിതാക്കൾ തുടങ്ങിയവർ പങ്കെടുത്തു. നവോത്ഥാനവാരത്തിന്റെ ഭാഗമായി 25ന് രാവിലെ 9.30 മുതൽ കുട്ടികൾക്കായി ചിത്രകല, സാഹിത്യ രചനാമത്സരങ്ങളും വൈകിട്ട് 5ന് കനകക്കുന്ന് പ്രവേശനകവാടത്തിനു മുന്നിൽ 'നവോദയം' ഡോക്യുഡ്രാമയും അരങ്ങേറും. 28ന് അയ്യങ്കാളി ദിനത്തിൽ വെള്ളയമ്പലത്തുള്ള അയ്യങ്കാളി പ്രതിമയിൽ പുഷ്പാർച്ചന നടത്തും. വൈകിട്ട് 4.30 മുതൽ ബാലഭവൻ ഓഡിറ്റോറിയത്തിൽ നടക്കുന്ന നവോത്ഥാന സദസിൽ രാഷ്ട്രീയ സാമൂഹ്യ സാംസ്‌കാരിക മേഖലയിലെ പ്രമുഖർ പങ്കെടുക്കും.