മേപ്പാടി: ദുരിതാശ്വാസ ക്യാമ്പിൽ താമസിക്കുന്നവർ ശുചിത്വം ഉറപ്പാക്കണമെന്ന് ജില്ലാ മെഡിക്കൽ ഓഫീസർ. ഭക്ഷണാവശിഷ്ടങ്ങൾ, മറ്റ് മാലിന്യങ്ങൾ എന്നിവ വലിച്ചെറിയാതെ അതത് സ്ഥലങ്ങളിൽ നിക്ഷേപിക്കണം. ഭക്ഷ്യവസ്തുക്കളും പാനീയങ്ങളും അടച്ച് സൂക്ഷിക്കണം. ആഹാരം കഴിക്കുന്നതിന് മുമ്പ് സോപ്പ് ഉപയോഗിച്ച് കൈകൾ നന്നായി കഴുകണം. തിളപ്പിച്ചാറിയ വെള്ളം മാത്രം കുടിക്കുക. മലമൂത്ര വിസർജ്ജനം ശൗചാലയത്തിൽ നടത്തുക. ശേഷം കൈകൾ സോപ്പ് ഉപയോഗിച്ച് നന്നായി കഴുകുക. വ്യക്തിശുചിത്വം പാലിക്കുക. വളർത്തുമൃഗങ്ങൾ, പക്ഷികൾ എന്നിവയെ ക്യാമ്പുകളിൽ താമസിക്കുന്നവരുമായി ഇടപഴകാൻ അനുവദിക്കരുത്. തുറസായ സ്ഥലങ്ങളിൽ തുപ്പരുത്. പനി, ജലദോഷം തുടങ്ങിയ രോഗങ്ങളുള്ളവർ മറ്റുള്ളവരുമായി ഇടപഴകരുത്. അസുഖ വിവരം ആരോഗ്യ പ്രവർത്തകരെ അറിയിക്കണം. ജീവിതശൈലീ രോഗങ്ങൾക്ക് മരുന്ന് കഴിക്കുന്നവർ മുടങ്ങാതെ കഴിക്കണം. വെള്ളക്കെട്ടുകളിൽ താമസിക്കുന്നവരും വെള്ളം കയറിയ ഇടങ്ങൾ വൃത്തിയാക്കുന്നവരും എലിപ്പനി പ്രതിരോധത്തിനായി ആരോഗ്യ പ്രവർത്തകരുടെ നിർദ്ദേശാനുസരണം ആഴ്ചയിലൊരിക്കൽ 200 മി. ഗ്രാം. ഡോക്സിസൈക്ലിൻ ഗുളിക കഴിക്കണമെന്നും അധികൃതർ അറിയിച്ചു.