മേപ്പാടി​: ചൂരൽമല, മുണ്ടക്കൈ ഉരുൾപൊട്ടൽ ദുരന്തത്തിൽ കാണാതായവരുടെ ആദ്യ കരട് പട്ടിക ജില്ലാ ഭരണകൂടം പ്രസിദ്ധീകരിച്ചു. മന്ത്രിസഭ ഉപസമിതിയുടെ നിർദ്ദേശ പ്രകാരം കളക്ടറുടെ മേൽനോട്ടത്തിലാണ് പട്ടിക തയ്യാറാക്കിയത്. പ്രദേശത്ത് നിന്ന് ദുരന്തത്തിന് ശേഷം കാണാതായ 138 പേരാണ് പട്ടികയിലുള്ളത്. റേഷൻ കാർഡ്, വോട്ടർ പട്ടിക തുടങ്ങിയ രേഖകൾ ഇതിനായി പരിശോധിച്ചു.

ഗ്രാമപഞ്ചായത്ത്, ഐ.സി.ഡി.എസ്, ജില്ലാ വിദ്യാഭ്യാസ ഓഫീസ്, ലേബർ ഓഫീസ്, ജില്ലാ ദുരന്തനിവാരണ അതോറിട്ടി തുടങ്ങിയവയുടെ കൈവശമുള്ള ആധികാരിക രേഖകൾ ഒത്തുനോക്കിയ ശേഷമാണ് പട്ടിക തയ്യാറാക്കിയത്. കാണാതായവരുടെ പേര്, റേഷൻകാർഡ് നമ്പർ, വിലാസം, ബന്ധുക്കളുടെ പേര്, വിലാസക്കാരനുമായുള്ള ബന്ധം, ഫോൺ നമ്പർ, ഫോട്ടോ എന്നിവയും പട്ടികയിലുണ്ട്.

പട്ടിക പരിശോധിച്ച് ജനങ്ങൾക്ക് എന്തെങ്കിലും വിവരങ്ങൾ അറിയക്കാനുണ്ടെങ്കിൽ ജില്ലാ ഭരണകൂടത്തെ ബന്ധപ്പെടാം. ലഭിക്കുന്ന വിവരങ്ങളുടെ അടിസ്ഥാനത്തിൽ ആളുകളെ കണ്ടെത്താൻ ശ്രമിക്കും. പട്ടികയിലില്ലാത്ത ആരെയെങ്കിലും കാണാതായതായി അറിയിപ്പ് ലഭിച്ചാൽ പരിശോധനയ്ക്കു ശേഷം അവരുടെ പേരുകൾ കൂടി കൂട്ടിച്ചേർക്കും. ജില്ലാ ഭരണകൂടത്തിന്റെ ഔദ്യോഗിക വെബ്‌സൈറ്റിലും കളക്ടറടക്കമുള്ളവരുടെ സോഷ്യൽ മീഡിയ അക്കൗണ്ടുകളിലും, കളക്ടറേറ്റിലെയും മറ്റും നോട്ടീസ് ബോർഡുകളിലും പട്ടിക ലഭ്യമാകും. അസി. കളക്ടർ ഗൗതം രാജിന്റെ നേതൃത്വത്തിലാണ് പട്ടിക തയ്യാറായത്. കാണാതായവരെ സംബന്ധിച്ച വിവരമറിയിക്കാൻ ഫോൺ: 8078409770.