ചേർത്തല: ഓരോരുത്തരും മതത്തിന്റെയും ജാതിയുടെയും വക്താക്കളാവുകയും അവർ പിന്നീട് ഇതിന്റെയൊക്കെ അംബാസിഡർന്മാരാകുന്ന സാഹചര്യമാണ് നിലവിൽ കണ്ടുവരുന്നതെന്ന് മന്ത്രി പി.പ്രസാദ് പറഞ്ഞു. ശ്രീനാരായണ മെമ്മോറിയൽ ഗവ.ബോയ്സ് ഹയർസെക്കൻഡറി സ്‌കൂളും താലൂക്ക് മഹാസമാധി ദിനാചരണകമ്മിറ്റിയും ചേർന്നു നടത്തിയ 97ാ മത് ശ്രീനാരായണ ഗുരുദേവ മഹാസമാധി ദിനാചരണത്തോടനുബന്ധിച്ച് നടത്തിയ പൊതുസമ്മേളനം ഉദ്ഘാടനം ചെയ്യുകയായിരുന്നു മന്ത്രി. ഗുരുദേവദർശനം മനുഷ്യർ ഇനിയും മനസിലാക്കിയില്ലെങ്കിൽ അപകടങ്ങളിലേക്ക് നയിക്കുമെന്നും മന്ത്രി പറഞ്ഞു.ശ്രീനാരായണ മെമ്മോറിയൽ ഗവൺമെന്റ് ബോയ്സ് ഹൈസ്‌കൂൾ ഓഡിറ്റോറിയത്തിൽ നടന്ന സമ്മേളനത്തിൽ ചേർത്തല താലൂക്ക് മഹാസമാധി ദിനാചരണ കമ്മിറ്റി ചെയർമാൻ സി.കെ.വിജയഘോഷ് ചാരങ്കാട്ട് അദ്ധ്യക്ഷത വഹിച്ചു. രാവിലെ സ്‌കൂൾ അങ്കണത്തിൽ പ്രിൻസിപ്പൽ ടി.ലേജുമോൾ പതാകഉയർത്തി. ശ്രീനാരായണഗുരുദേവൻ കണ്ണാടി പ്രതിഷ്ഠ നടത്തിയ കളവംകോടം ശക്തീശ്വരം ക്ഷേത്രത്തിൽ നിന്ന് ദീപശിഖ പ്രത്യേകപൂജകൾക്ക് ശേഷം ക്ഷേത്രം പ്രസിഡന്റ് സി.കെ.ഷാജി മോഹൻ വിജയഘോഷ് ചാരങ്കാട്ടിന് കൈമാറി. തുടർന്ന് ദീപശിഖയേന്തിയ വിദ്യാർത്ഥികൾ വിവിധ ഇടങ്ങളിൽ സ്വീകരണങ്ങൾ ഏറ്റുവാങ്ങി സ്‌കൂളിൽ എത്തിച്ചേർന്ന് പുഷ്പാർച്ചനയും മഹാസമാധി സമൂഹ പ്രാർത്ഥനയും നടത്തി.വൈകിട്ട് നഗരത്തിൽ മൗനജാഥയും സംഘടിപ്പിച്ചു.
സമ്മേളനത്തിൽ സ്‌കൂൾ പ്രിൻസിപ്പാൾ ടി.ലേജുമോൾ സ്വാഗതം പറഞ്ഞു.
ശ്രീനാരായണ ഓപ്പൺ സർവകലാശാല അസിസ്റ്റന്റ് പ്രൊഫസർ ഡോ.എൻ.നൗഫൽ മുഖ്യപ്രഭാഷണം നടത്തി.വിദ്യാർത്ഥികൾക്ക് നഗരസഭ ചെയർപേഴ്സൺ ഷേർളിഭാർഗവൻ ഉപഹാരം നൽകി. വൈസ് ചെയർമാൻ ടി.എസ്. അജയകുമാർ,വാർഡ് കൗൺസിലർ രാജശ്രീ ജ്യോതിഷ്,പ്രധാന അദ്ധ്യാപിക ടി.എസ്.ജിഷ,പി.ടി.എ പ്രസിഡന്റ് ടി.എസ്.രാജു,താലൂക്ക് മഹാസമാധി ജനറൽ കൺവീനർ കെ.ആർ.രാജു,കൺവീനർ ഷൈജു കുളത്രക്കാട്,സ്‌കൂൾ സ്റ്റാഫ് സെക്രട്ടറി കെ.ഐ.റോസ്‌മേരി,സീനിയർ അസിസ്റ്റന്റ് നിഷ അലക്സ്,ദിവ്യ എന്നിവർ സംസാരിച്ചു.