ഹരിപ്പാട് : കരിമണൽ ഖനനം നിറുത്തി വയ്ക്കണമെന്നും തൃക്കുന്നപ്പുഴ ആറാട്ടുപുഴ പഞ്ചായത്തുകളിൽ ചെല്ലാനം മാതൃകയിൽ കടൽ ഭിത്തി നിർമ്മിക്കണമെന്നും ആവശ്യപ്പെട്ട് സി.പി.ഐ ഹരിപ്പാട് മണ്ഡലം കമ്മിറ്റിയുടെ നേതൃത്വത്തിൽ ആറാട്ടുപുഴയിൽ നിന്ന് തൃക്കുന്നപ്പുഴ വരെ തീരദേശ സംരക്ഷണ മാർച്ച് സംഘടിപ്പിച്ചു. ആറാട്ടുപുഴയിൽ ജില്ലാ സെക്രട്ടറി ടി.ജെ.ആഞ്ചലോസ് ഉദ്ഘാടനം ചെയ്തു. ദുരന്ത നിവാരണത്തിന്റെ മറവിൽ തോട്ടപ്പളളിയിൽ ആരംഭിച്ച കരിമണൽ ഖനനം ഹരിപ്പാട്, അമ്പലപ്പുഴ മണ്ഡലങ്ങളിലെ തീരദേശ ജനതയുടെ ജീവിതം ദുരിതപൂർണമാക്കിയെന്ന് അദ്ദേഹം പറഞ്ഞു. എം മുസ്തഫ അദ്ധ്യക്ഷത വഹിച്ചു. പി.ബി.സുഗതൻ വടക്കടം സുകുമാരൻ, ശ്രീമോൻ പള്ളിക്കൽ, ആർ അഞ്ജലി, രതീശൻപിള്ള എന്നിവർ സംസാരിച്ചു. സി.പി.ഐ മണ്ഡലം സെക്രട്ടറി സി.വി.രാജീവ് ജാഥാ ക്യാപ്ടനും മത്സ്യത്തൊഴിലാളി യൂണിയൻ മണ്ഡലം സെക്രട്ടറി കെ .അനിലാൽ വൈസ് ക്യാപ്ടനും സി.പി.ഐ ജില്ലാ എക്സിക്യൂട്ടീവ് അംഗം കെ. കാർത്തികേയൻ ഡയറക്ടറുമായ ജാഥ തൃക്കുന്നപ്പുഴയിൽ സമാപിച്ചു. സമാപന സമ്മേളനം എ.ഐ.വൈ.എഫ് സംസ്ഥാന സെക്രട്ടറി ടി.ടി.ജിസ്മോൻ ഉദ്ഘാടനം ചെയ്തു . സി.പി.ഐ പല്ലന ലോക്കൽ കമ്മിറ്റി സെക്രട്ടറി കെ.സുഗതൻ അദ്ധ്യക്ഷത വഹിച്ചു . തൃക്കുന്നപ്പുഴ ലോക്കൽ കമ്മിറ്റി സെക്രട്ടറി നസീർ ചേലക്കാട് ജില്ലാ പഞ്ചായത്ത് അംഗം എ. ശോഭ,യു ദിലീപ്, കെ.എ.കമറുദ്ദീൻ എന്നിവർ സംസാരിച്ചു.