ആലപ്പുഴ: ഹൗസ്ബോട്ട് സവാരിക്കിടെ കായലിൽ ചാടിയ മകളെ രക്ഷിക്കാൻ ശ്രമിച്ച ഗൃഹനാഥൻ മുങ്ങിമരിച്ചു. തമിഴ്‌നാട്‌ തിരുനെൽവേലി ലെവഞ്ചിപുരം കോയിൽതെണ്ട തെരുവിൽ ജോസഫ്‌ ഡി. നിക്‌സണാണ് (58) മരിച്ചത്‌. ഇന്നലെ ഉച്ചയ്ക്ക് ഒന്നോടെ വേമ്പനാട്ട് കായലിൽ ആർ ബ്ലോക്കിന്‌ സമീപം ചിത്തിരക്കായലിലാണ്‌ സംഭവം. തിരുനെൽവേലിയിൽ നിന്നെത്തിയ ബന്ധുക്കളടങ്ങുന്ന 13 അംഗ സംഘമായിരുന്നു ഹൗസ്ബോട്ടിൽ ഉണ്ടായിരുന്നത്‌. യാത്രയ്‌ക്കിടെ വഴക്കിട്ട മകൾ സഹയ ബിനിഷ (30) കായലിലേക്ക്‌ ചാടുകയായിരുന്നു. ബിനിഷയെ രക്ഷിക്കാൻ ജോസഫും മകനും പിന്നാലെ ചാടി. നിലവിളി കേട്ടെത്തിയ ബോട്ട്‌ ജീവനക്കാർ ജോസഫിനെ മകനേയും കരയ്ക്കുകയറ്റി. സ്‌പീഡ്‌ബോട്ടിൽ മെഡിക്കൽ കോളേജ്‌ ആശുപത്രിയിലെത്തിച്ചെങ്കിലും ജോസഫിനെ രക്ഷിക്കാനായില്ല. വെള്ളത്തിൽ നിന്ന്‌ കയറാൻ കൂട്ടാക്കാത്ത മകളെ പിന്നീട്‌ ബന്ധുക്കളും ജീവനക്കാരും ചേർന്ന്‌ ബലമായി പിടിച്ചുകയറ്റി ആലപ്പുഴ മെഡിക്കൽ കോളേജ്‌ ആശുപത്രിയിൽ പ്രവേശിപ്പിച്ചു.