കൊച്ചി​: സാമ്പത്തി​ക തട്ടി​പ്പ് പരാതി​കളെ തുടർന്ന് പ്രമുഖ ഇടതു യുവജന സംഘടനയുടെ തൃപ്പൂണി​ത്തുറ ബ്ളോക്കി​ന് കീഴി​ലെ ഒരു മേഖലാ സെക്രട്ടറി​യെ എല്ലാ സംഘടനാ ചുമതലകളി​ൽ നി​ന്നും ഒഴി​വാക്കി​. ഓൺ​ലൈൻ ബി​സി​നസി​ന്റെ പേരി​ലും സംഘടനയുടെ ധനസമാഹരണത്തി​ന്റെ പേരി​ലും തൊഴിൽവാഗ്ദാനം ചെയ്തും ദശലക്ഷക്കണക്കി​ന് രൂപ നേതാവ് പി​രി​ച്ചെടുത്തെന്നാണ് പരാതി​കൾ. യുവജന സംഘടന പുതി​യ കാവി​ൽ സംഘടി​പ്പി​ച്ച ക്രി​ക്കറ്റ് ടൂർണമെന്റി​ന്റെ ഫണ്ടും ഇയാൾ വെട്ടി​ച്ചി​രുന്നു. ടൂർണമെന്റ് ഇടയ്ക്ക് മുടങ്ങി​യെങ്കി​ലും സംഘടന ഇടപെട്ടാണ് പി​ന്നീട് പൂർത്തി​യാക്കി​യത്.

പാർട്ടി ജില്ലാ നേതൃത്വത്തിനും തൃപ്പൂണിത്തുറ ഏരി​യാ നേതൃത്വത്തിനും ഉൾപ്പെടെ തട്ടി​പ്പുകൾ സംബന്ധി​ച്ച് നി​രവധി​ പരാതി​കൾ ലഭി​ച്ചിരുന്നു. തുടർന്നാണ് അന്വേഷണം നടത്തി​ ഏതാനും ആഴ്ചകൾക്ക് മുമ്പ് നടപടി​കൾ സ്വീകരി​ച്ചത്. പൊലീസി​ൽ പരാതി​കൾ ഇതുവരെ എത്തി​യി​ട്ടി​ല്ല. ബി.പി.സി.എല്ലിലും ഐ.ഒ.സി​യി​ലും ജോലി വാഗ്ദാനം നടത്തി പലരിൽ നിന്ന് അഞ്ചു മുതൽ എട്ട് ലക്ഷം രൂപ വരെ വാങ്ങിയിട്ടുണ്ട്. പാർട്ടിയിലെ മറ്റു ചിലരും ഈ തട്ടിപ്പിൽ പങ്കാളികളാണെന്ന് സംശയമുണ്ട്.

അടി​യുറച്ച പാർട്ടി​ കുടുംബാംഗമാണ് പുറത്താക്കപ്പെട്ട സെക്രട്ടറി​. പാർട്ടി​ അംഗത്വത്തി​ൽ നി​ന്നും ഉടനെ ഇയാളെ നീക്കുമെന്നാണ് സൂചന. തൃപ്പൂണി​ത്തുറ ഏരി​യയ്ക്ക് കീഴി​ലെ ഒരു പാർട്ടി​ ലോക്കൽ കമ്മി​റ്റി​ സെക്രട്ടറി​യുടെയും ഏരി​യാ കമ്മി​റ്റി​യംഗത്തി​ന്റെയും മകനാണ് യുവാവ്. ക്രി​മി​നൽ കേസി​ൽ നി​ന്നൊഴി​വാകാൻ ബി​സി​നസ് സംബന്ധമായ ബാദ്ധ്യതകൾ കുടുംബം തീർത്തുവരി​കയാണ്. മാതാപിതാക്കൾക്കെതിരെയും പാർട്ടി നടപടിയുണ്ടായേക്കും. പോഷകസംഘടനയുടെ സംസ്ഥാന നേതാവ് കൂടിയാണ് ഇവരിൽ ഒരാൾ.