വിദ്യാർത്ഥികളിൽ കാർഷിക കോഴ്‌സിന്റെ സാദ്ധ്യതകൾ, തൊഴിലവസരങ്ങൾ എന്നിവയെക്കുറിച്ചു സംശയങ്ങളേറെയുണ്ട്. കൃഷി അഗ്രിബിസിനസിലേക്കു മാറുന്ന ഇക്കാലത്ത് ഭക്ഷ്യ സംസ്‌കരണം, ഭക്ഷ്യ റീട്ടെയ്ൽ തുടങ്ങിയ സേവന മേഖലയിലാണ് തൊഴിലവസരങ്ങൾ ഏറെയുള്ളത്.
എഫ്.പി.ഒ നയം രാജ്യത്ത് രൂപപ്പെട്ടതോടെ അഗ്രി ബിസിനസ് മാനേജ്‌മെന്റിന് പ്രസക്തിയേറുന്നുണ്ട്. രാജ്യത്ത് പ്രതിവർഷം പതിനായിരത്തിലധികം കർഷക ഉത്പാദക സംഘടനകൾ അഥവാ എഫ്.പി.ഒകൾ രൂപപ്പെട്ടു വരുന്നു. ഇതുമായി ബന്ധപ്പെട്ട് ഉത്പാദനം, സംസ്‌കരണം, ഗുണനിലവാരം വിലയിരുത്തൽ, മാർക്കറ്റിംഗ്, കയറ്റുമതി എന്നിവയിൽ കാർഷിക ബിരുദധാരികൾക്ക് ഏറെ അവസരങ്ങളുണ്ട്.
മാറി ചിന്തിക്കാം
........................
അക്കാഡമിക്, ഗവേഷണ മേഖലകളിൽ കാർഷിക കോഴ്‌സുകളിൽ ഉന്നത ബിരുദം നേടിയവർക്ക് ലോകത്തെമ്പാടും അവസരങ്ങളുണ്ട്. ഇന്ത്യൻ കാർഷിക ഗവേഷണ കൗൺസിലിന്റെ നെറ്റ്/ JRF/SRF പരീക്ഷയെഴുതി കാർഷിക സയന്റിസ്റ്റാകാം. കാർഷിക കോഴ്‌സുകളിൽ ബി.എസ്‌സി അഗ്രികൾച്ചർ, ഹോർട്ടികൾച്ചർ, ഫോറസ്ട്രി, ബി.വി.എസ്‌സി, ബി.എഫ്.എസ്‌സി, ബി. ടെക് അഗ്രിക്കൾച്ചർ എൻജിനിയറിംഗ്, ഡെയറി ടെക്‌നോളജി, ബി.എസ്‌സി കോഓപ്പറേഷൻ & ബാങ്കിംഗ്, ക്ലൈമറ്റോളജി, ബയോടെക്‌നോളജി എന്നിവ ഉൾപ്പെടുന്നു. വെറ്റിനറി സയൻസ് പഠിച്ചവർക്ക് രാജ്യത്തിനകത്തും വിദേശത്തും മൃഗചികിത്സ ഗവേഷണ രംഗത്ത് അവസരങ്ങളുണ്ട്. സ്വയംതൊഴിൽ, സ്വകാര്യ- സംരംഭകത്വ സ്റ്റാർട്ടപ്പ് മേഖലയിലും എം.എസ്.എം.ഇയിലും അവസരങ്ങളുണ്ട്.
എഫ്.പി.ഒകൾ വിജയകരമായി പ്രവർത്തിക്കാൻ സി.ഇ.ഒമാർ വേണം. ഇതിന് അഗ്രിബിസിനസ് മാനേജ്മെന്റ് വിദഗ്ദ്ധരെ വേണം. അഗ്രിബിസിനസിന്റെ എല്ലാ തലങ്ങളിലും പ്രവർത്തിക്കാൻ ഇവർക്ക് കഴിയും. ആവശ്യത്തിന് വേണ്ട വിദഗ്ദ്ധരെ ഈ മേഖലയിൽ ഇന്ന് ലഭിക്കുന്നില്ല. എം.എസ്.എം.ഇ മേഖലയിൽ രൂപപ്പെടുന്ന സംരംഭങ്ങളിൽ 75 ശതമാനവും കൃഷിയിലാണ്.
സഹായിക്കാൻ വമ്പൻമാരും
......................................
കാർഷിക മാനേജ്മെന്റ് രംഗത്ത് തൊഴിൽ നല്കാൻ ലോക ബാങ്ക്, ഏഷ്യൻ ഡെവലപ്‌മെന്റ് ബാങ്ക്, ദേശസാത്കൃത-സഹകരണ- സ്വകാര്യ ബാങ്കുകൾ തയ്യാറാണ്. കാർഷിക മേഖലയിലെ നിർമ്മാതാക്കൾ, സേവന ദാതാക്കൾ, ഫെർട്ടിലൈസർ കമ്പനികൾ, സാങ്കേതികവിദ്യ സേവന ദാതാക്കൾ, സാമ്പത്തിക സ്ഥാപനങ്ങൾ, സ്വകാര്യ കമ്പനികൾ, ഡ്രോൺ കമ്പനികൾ, കാർഷിക എൻജിനിയറിംഗ് കമ്പനികൾ, മഹീന്ദ്ര, സഹകരണ സംഘങ്ങൾ, ഇഫ്‌കോ, അമുൽ, ക്ഷീരോത്പാദക യൂണിയനുകൾ, ഐ.ടി.സി, സിഗ്‌മെന്റ, യു.പി.എൽ എന്നിവയും തൊഴിലുമായി ചുറ്റുമുണ്ട്.
പഠനം എവിടെ എങ്ങനെ
.................................
അഗ്രിബിസിനസ് മാനേജ്മെന്റ് കോഴ്‌സുകൾ പൂർത്തിയാക്കിയവർക്ക് മാനേജീരിയൽ തൊഴിലുകളാണ് ലഭിക്കുന്നത്. അതിനാൽ ബിരുദാനന്തര കോഴ്‌സുകളാണ് കൂടുതലായും ഇന്ത്യയിലുള്ളത്. ഏത് ബിരുദധാരിക്കും ചേരാവുന്ന ബിരുദാനന്തര കോഴ്‌സുകളുണ്ട്. കാർഷിക, വെറ്റിനറി, ഫിഷറീസ് മുതലായവയിൽ ബിരുദം പൂർത്തിയാക്കിയവർക്ക് ചേരാവുന്ന അഗ്രിബിസിനസ് മാനേജ്മെന്റ്, സപ്ലൈ ചെയിൻ മാനേജ്മന്റ്, റൂറൽ മാനേജ്മന്റ് കോഴ്‌സുകളുണ്ട്. ഹൈദരാബാദിലെ നാഷണൽ ഇൻസ്റ്റിറ്റ്യൂട്ട് ഒഫ് എക്സ്റ്റൻഷൻ മാനേജ്‌മെന്റിലെ അഗ്രിബിസിനസ്, സപ്ലൈ ചെയിൻ മാനേജ്മെന്റ് ബിരുദാനന്തര കോഴ്‌സുകൾക്ക് പ്രവേശനം ലഭിക്കാനുള്ള പ്രാഥമിക യോഗ്യത കാർഷിക, കാർഷിക അനുബന്ധ ബിരുദമാണ്.
കേരള കാർഷിക സർവ്വകലാശാല, ഇന്ത്യൻ ഇൻസ്റ്റിറ്റ്യൂട്ട് ഒഫ് മാനേജ്മെന്റ് എന്നിവ നടത്തുന്ന അഗ്രിബിസിനസ് മാനേജ്മെന്റ് പ്രോഗ്രാമുകൾക്ക് ഏത് ബിരുദധാരികൾക്കും അപേക്ഷിക്കാം. കാർഷിക, അനുബന്ധ ബിരുദധാരികൾക്ക് ആനന്ദിലെ ഇൻസ്റ്റിറ്റ്യൂട്ട് ഒഫ് റൂറൽ മാനേജ്മെന്റ് നടത്തുന്ന റൂറൽ മാനേജ്മെന്റ് പ്രോഗ്രാമിനും, നാഷണൽ ഇൻസ്റ്റിറ്റ്യൂട്ട് ഒഫ് റൂറൽ ഡെവലപ്‌മെന്റ് നടത്തുന്ന റൂറൽ മാനേജ്മെന്റ് പ്രോഗ്രാമിനും ചേരാം.
വിദേശ സാദ്ധ്യതകൾ
....................................
ബിരുദധാരികൾക്ക് ചേരാവുന്ന നിരവധി അഗ്രിബിസിനസ് മാനേജ്മെന്റ് കോഴ്‌സുകൾ ന്യൂസിലാൻഡ്, നെതർലാൻഡ്‌സ്, ഓസ്‌ട്രേലിയ, യു.കെ രാജ്യങ്ങളിലെ സർവ്വകലാശാലകളിലുണ്ട്. നെതർലാൻഡ്സിലെ ഹാസ്, വാഗെനിങ്കൻ സർവ്വകലാശാലകൾ, ഓസ്‌ട്രേലിയയിലെ യൂണിവേഴ്‌സിറ്റി ഒഫ് വെസ്റ്റേൺ ഓസ്‌ട്രേലിയ, യു.കെയിലെ ബ്രിസ്റ്റോൾ സർവകലാശാല എന്നിവിടങ്ങളിൽ മികച്ച പ്രോഗ്രാമുകളുണ്ട്. നിരവധി ഗവേഷണ പ്രോഗ്രാമുകളുമുണ്ട്.
സാങ്കേതിക വിദ്യകൾക്കും സാദ്ധ്യതയേറും
..................................
കാർഷിക മേഖലയിൽ കൂടുതൽ സാങ്കേതികവിദ്യകൾ പ്രവർത്തികമാകും. അഡ്വാൻസ്ഡ് സാങ്കേതിക വിദ്യകൾ, ശാസ്ത്രീയ പരിചരണം, ഉത്പാദനവർദ്ധനവ്, മൂല്യവർദ്ധിത ഉത്പന്ന നിർമ്മാണം, രോഗ നിയന്ത്രണം, വിപണനം എന്നീ മേഖലകളിലായിരിക്കും സാങ്കേതിക വിദ്യയുടെ വളർച്ച. ഡ്രോൺ ടെക്‌നോളജിയിലുള്ള വളം, കീടനാശിനി എന്നിവ തളിക്കൽ, വിളനാശം വിലയിരുത്തൽ, രോഗ നിരീക്ഷണം, കീട നിയന്ത്രണം, പരിചരണം, കൂലിച്ചെലവ് കുറയ്ക്കൽ എന്നിവ ഉദാഹരണങ്ങളാണ്. നിർമ്മിത ബുദ്ധി (AI), ഇന്റർനെറ്റ് ഒഫ് തിംഗ്സ്, മെഷീൻ ലേണിംഗ്, ബ്‌ളോക്ക് ചെയിൻ ടെക്‌നോളജി, ഓട്ടോമേഷൻ എന്നിവ കാർഷിക മേഖലയിൽ കൂടുതലായി അവലംബിക്കും. ഇത് ഉല്പാദന വർദ്ധനവ്, റെസിഡ്യൂ മോണിറ്ററിംഗ് എന്നിവയെ സഹായിക്കും.
നഴ്സിംഗ് പ്രവേശനം ഒക്ടോബർ 31വരെ
തിരുവനന്തപുരം : ബി.എസ്‌സി നഴ്സിംഗ് ഉൾപ്പെടെ വിവിധ നഴ്സിംഗ് കോഴ്സുകളിലേക്കുള്ള പ്രവേശനം ഒക്ടോബർ 31വരെ നീട്ടി. പ്രവേശന നടപടികൾ ഈമാസം 30ന് അവസാനിക്കാനിരിക്കെയാണ് ഇന്ത്യൻ നഴ്സിംഗ് കൗൺസിൽ തീയതി നീട്ടിയത്.