കൊച്ചി: സംവിധായകൻ ആഷിഖ് അബുവിനെതിരെ നടക്കുന്ന വർഗീയ വിദ്വേഷസ്വഭാവമുള്ളതും മതസ്പർദ്ധ വളർത്തുന്നതുമായ വ്യാജ പ്രചാരണങ്ങൾക്കെതിരെ നിയമനടപടി സ്വീകരിക്കുമെന്ന് എ.ഐ.വൈ.എഫ് സംസ്ഥാന പ്രസിഡന്റ് എൻ. അരുണും സെക്രട്ടറി ടി.ടി. ജിസ്‌മോനും അറിയിച്ചു.

സിനിമാമേഖലയിൽ നിലനിൽക്കുന്ന വിവിധ പ്രശ്‌നങ്ങൾ തുറന്നുപറയുകയും സ്ത്രീസുരക്ഷയും തൊഴിലാളിചൂഷണവും ഉൾപ്പെടെയുള്ള വിഷയങ്ങൾ ഉയർത്തിപ്പിടിക്കുകയും ചെയ്യുന്ന സംവിധായകൻ ആഷിഖ് അബുവിനെതിരെ സാമൂഹ്യ മാദ്ധ്യമങ്ങളിലടക്കം നടത്തുന്ന സംഘടിതവും ആസൂത്രിതവുമായ അക്രമണങ്ങൾ അപലപനീയമാണ്. മലയാളസിനിമയ്ക്കും സാംസ്‌കാരിക മേഖലയ്ക്കും വലിയ പ്രത്യാഘാതം സൃഷ്ടിക്കുന്ന സമകാലിക സംഭവ വികാസങ്ങൾക്കെതിരെ നിലപാട് സ്വീകരിച്ചതിന്റെ പേരിൽ ആഷിഖ് അബുവിനെ വളഞ്ഞിട്ട് ആക്രമിക്കാൻ അനുവദിക്കില്ലെന്നും നേതാക്കൾ വ്യക്തമാക്കി.